Qazaqstan men Bolgarıa arasyndaǵy dıplomatıalyq qarym-qatynastardyń ornaǵanyna 30 jyl
2021 jyly Qazaqstan men Bolgarıa arasyndaǵy taýar aınalymy 390,8 mln AQSH dollaryna jetti. 2022 jyldyń alǵashqy 3 aıynda bul kórsetkish 36,65 mln. AQSH dollaryn qurady, dep habarlaıdy Almaty-akshamy.kz QR Syrtqy ister mınıstrliginiń baspasóz qyzmetine silteme jasap.
5 maýsymda Qazaqstan Respýblıkasy men Bolgarıa Respýblıkasy arasyndaǵy dıplomatıalyq qarym-qatynastardyń ornaǵanyna 30 jyl tolady. Aıtýly oqıǵaǵa oraı eki memlekettiń basshylary Qasym-Jomart Toqaev pen Rýmen Radev, sondaı-aq Qazaqstan Premer-Mınıstriniń orynbasary – Syrtqy ister mınıstri Muhtar Tileýberdi men Bolgarıa Syrtqy ister mınıstri Teodora Genchovska ózara quttyqtaý hat almasty. Nur-Sultan men Sofıada mereıtoıǵa oraı eki memlekettiń syrtqy ister mınıstrlikterinde resmı kezdesýler ótti. Qazaqstan Syrtqy ister mınıstriniń orynbasary Roman Vasılenko Bolgarıa Elshisi Boıan Hadjıevti, al Bolgarıa Syrtqy ister mınıstriniń orynbasary Vasıl Georgıev Qazaqstan Elshisi Temirtaı İzbastındi qabyldady.
«Tarıhı meje boıynsha osyndaı qysqa kezeń ishinde senimdi saıası dıalog qalyptasyp úlgerdi. Ol ilgeri damyp keledi, buǵan ekijaqty kún tártibindegi problemalyq máselelerdiń joqtyǵy jáne joǵary jáne bıik deńgeılerdegi baılanystardyń turaqty dınamıkasy dálel bola alady», – dep atap ótti.R. Vasılenko.
Dıplomattar aldaǵy jyldary jan-jaqty yntymaqtastyq saıası, saýda-ekonomıkalyq jáne mádenı-gýmanıtarlyq salalarda halyqtarymyzdyń ıgiligi úshin odan ári keńeıe beretinine senim bildirdi. Eki el arasynda joǵarǵy jáne úkimettik deńgeıde turaqty baılanystar ornatylǵanyn, sondaı-aq parlamentaralyq dıalogtyń qarqyndy damý serpinin rızashylyqpen atap ótti. Taraptar saýda-ekonomıkalyq jáne ınvestısıalyq ózara is-qımyldy odan ári keńeıtý qajettiligine erekshe toqtaldy. Qazaqstan, Bolgarıa úshin Ortalyq Azıa elderi arasyndaǵy eń iri saýda seriktesi bolyp tabylady. Sonymen birge, Bolgarıa Qazaqstannyń Balqan óńiri memleketteri arasyndaǵy top-5 saýda seriktesteriniń qataryna kiredi. Sondaı-aq ınvestısıa salasyndaǵy ózara is-qımyl josparly túrde damýda. Qazaqstan ekonomıkasyna bolgar ınvestısıalarynyń jıyntyq jalpy aǵyny 2005-2021 jyldar aralyǵynda 55,8 mln dollarǵa jetti. Bul shama kúnnen-kúnge artyp keledi. Týrızm jáne aýyl sharýashylyǵy sekildi salalarda perspektıvaly birlesken jobalardy damytý úshin úlken áleýet bar. Eki el bir-birinen myńdaǵan shaqyrym qashyqtyqta ornalasqanyna qaramastan, olardy ortaq tarıhı taǵdyr biriktirip otyr. Qazaqstannyń shyqqan tegi bolgar azamattary el ómiriniń belsendi qatysýshylary bolyp tabylady. Bolgarlardyń ulttyq tilin, mádenıeti men dástúrlerin damytý maqsatynda Qazaqstanda bolgar etnomádenı birlestikteri Aqtóbe oblysyndaǵy «Vára», Nur-Sultanda «Zlata», Pavlodar oblysynda «Slaváne» jáne Atyraý oblysyndaǵy «Vozrojdenıe» ortalyqtary ashyldy. Pavlodar oblysynda K. B. Darjýman atyndaǵy Ulttyq jańǵyrý mektebiniń bolgar bólimi tabysty jumys isteýde. QR Syrtqy ister mınıstrligindegi kezdesýdiń qorytyndysy boıynsha eki memleket jáne halyqtar arasynda ózara tıimdi yqpaldastyq pen dostyqtyń aldaǵy ýaqytta da qaryshty damýyna ortaq senim bildirildi.