Bólim 2020 jyly mamyr aıynda kúrdeli jóndeýge jabylǵan
Pedıatrıa jáne balalar hırýrgıasy ǵylymı ortalyǵynyń Nárestelerge arnalǵan anestezıologıa, reanımasıa jáne qarqyndy terapıa bólimi kúrdeli jóndeýden keıin qaıta ashyldy, dep habarlaıdy Almaty-akshamy.kz Baq.kz-ke silteme jasap.
Bólim 2020 jyly mamyr aıynda kúrdeli jóndeýge jabylǵan edi. Qazirgi ýaqytta jedel emdi qajet etetin sábıler qajetti em-sharalaryn alyp, operasıalar josparly túrde júrgizilýde.
Jańartylǵan bólimde lamınarly aýa aǵyny bar taza bólmeler kesheni bar. Bul júıe kishkentaı naýqastardy ınfeksıalyq aýrýlardan juqtyrýdy saqtaıdy jáne jańa týǵan nárestelerdiń tez saýyǵýyna yqpal etedi.
Respýblıkalyq ortalyqtyń jańa týǵan nárestelerge arnalǵan reanımasıa bólimi 2003 jyldan bastap jumys isteıdi. Bólim respýblıkanyń ár aımaǵynan sanavıasıa jelisi boıynsha kelip túsken nárestelerge joǵary bilikti mamandandyrylǵan shuǵyl jáne josparly medısınalyq kómek kórsetedi.
Bólimde hırýrgıalyq patologıalardyń kóptegen túrlerine shaldyqqan, atap aıtqanda óńesh atrezıasy, dıagfragmalyq jaryq, ártúrli ishek tarylýy, gastroshızıs, omfaloselle, anýsaatrezıasy, sonymen qatar shala týǵan nárestelerdegi retınopatıa, ókpe qyzmetiniń kúrdeli buzylystary, túrli somatıkalyq patologıalary bar jáne t.b. shala týǵan sábıler men aýyr jaǵdaıdaǵy kishkentaı pasıentterge kómek kórsetiledi.
Bólim 6 tósek-orynǵa arnalǵan. Bólim neonataldi blokta ornalasqan jáne onyń qurylymyna neonataldi ota jasaý bólimi kiredi. Medısınalyq kómek kórsetý jumysy anestezıolog-reanımatolog, anestezıolog meıirbıkeler, kishi medısına personaldarynyń jiti qadaǵalaýynda táýlik boıy júrgiziledi.
Barlyq qajetti últradybystyq jáne rentgenologıalyq zertteýler, zerthanalyq-dıagnostıkalyq is-sharalar táýlik boıy júzege asyrylady.
Jańa kelbettegi bólimge kishkentaı pasıentterimizdiń ata-analary dán rıza.