Erve More óz kezeginde Qazaqstanda júrgizilip jatqan reformalardy joǵary baǵalady
Qazaqstan Respýblıkasy Parlamenti Senatynyń tóraǵasy Máýlen Áshimbaev «Fransıa-Ortalyq Azıa» dostyq tobynyń tóraǵasy Erve More bastaǵan Fransýz Respýblıkasy Senatynyń delegasıasymen kezdesti, dep habarlaıdy Almaty-akshamy.kz Senattyń baspasóz qyzmetine silteme jasap.
Máýlen Áshimbaev áńgime barysynda elimizdiń saıası júıesin transformasıalaýǵa baǵyttalǵan konstıtýsıalyq reforma týraly egjeı-tegjeıli aıtyp berdi. Senat Tóraǵasy el Prezıdentiniń bastamasy boıynsha júzege asqan barlyq ózgeristerdiń túpki maqsaty – qazaqstandyqtardyń ómirin jaqsartý, saıası básekelestik úshin jaǵdaı jasaý jáne árbir azamattyń áleýetin iske asyrý ekenin atap ótti.
Taraptar eki eldiń parlamentaralyq qarym-qatynastaryn odan ári damytý jáne tereńdetýdiń keleshegin egjeı-tegjeıli talqylady.
«Eki eldiń Parlamentterinde jumys isteıtin dostyq toptary parlamentaralyq dıalogtyń berik negizin quraıdy. Biz «Fransıa - Ortalyq Azıa» parlamentaralyq dostyq tobynyń qyzmetin tolyq qoldaımyz jáne onyń jumysy bizdiń parlamentaralyq baılanystarymyzdy ulǵaıtýǵa eleýli úles qosady dep sanaımyz», - dedi Máýlen Áshimbaev.
Kezdesý barysynda depýtattardyń ekonomıka, mádenı-gýmanıtarlyq jáne basqa da salalardaǵy yntymaqtastyǵyn tereńdetýge járdemdesý máseleleri talqylandy. Senat Tóraǵasy ekologıa jáne transshekaralyq ózender, sonyń ishinde Aral teńizi problemalaryn sheshý jónindegi túrli elder parlamentshileriniń birlesken kúsh-jigeri qajettigine nazar aýdardy. Ol buǵan deıin Fransýz senatorlarynyń delegasıasy – «Fransıa-Ortalyq Azıa» dostyq tobynyń músheleri Aral máselesiniń aýqymyn zertteý úshin Kókaral bógetine barǵanyn eske saldy.
«Bul baǵyttaǵy ózara is-qımyldy qaıta bastaý mańyzdy dep sanaımyz. Bizdiń elderimizdiń senatorlary Aral ekojúıesin qalpyna keltirýge jáne óńirdi ornyqty damytýǵa baılanysty máselelerdi qarastyra alar edi», - dedi Máýlen Áshimbaev.
Erve More óz kezeginde Qazaqstanda júrgizilip jatqan reformalardy joǵary baǵalady. Ol sondaı-aq eki el parlamentteriniń yntymaqtastyǵyn kúsheıtýdiń mańyzyna toqtalyp, mundaı tásil ekonomıkalyq, mádenı-gýmanıtarlyq jáne basqa da baılanystardy nyǵaıtýǵa oń yqpal etetinin atap ótti. Fransýz parlamentshisi sonymen qatar Aral taǵdyry men óńirdiń turaqty damýynyń basqa da máselelerin sheshý boıynsha birlesip jumys isteý qajettigi týraly ıdeıany qoldady.