Qazaqstan Respýblıkasynyń Úkimeti 2025 jyldyń 13 naýryzynan bastap alty aıǵa maldyń reprodýktıvti tobyn – iri qara men usaq qarany shetelge shyǵarýǵa tyıym salýdy uzartady. Bul týraly aqshamnews.kz habarlaıdy Aýyl sharýashylyǵy mınıstrligine silteme jasap.
Mınıstrlik osy máselege baılanysty arnaıy qaýly jobasyn ázirlep, ony "Ashyq NQA" portalynda jarıalap, qoǵamdyq talqylaýǵa 20 naýryzǵa deıin shyǵardy.
«Qazaqstan Respýblıkasynyń aýmaǵynan iri qara jáne usaq qaranyń reprodýktıvti tobyn (matochnoe pogolove) shyǵarýǵa tyıym salý merzimi alty aıǵa uzartylsyn» delingen qujatta.
Aýyl sharýashylyǵy mınıstrliginiń málimetteri boıynsha, 2025 jyldyń 1 qańtaryna deıin Qazaqstanda iri qara maldyń jalpy sany 7 842,6 myń basty qurap, ótken jyldyń osy kezeńimen salystyrǵanda 18,5%-ǵa artqan. Onyń ishinde, iri qaranyń analyq basy 4 380 myń bas nemese 19,7%-ǵa ósken.
2024 jyldyń sońyna qaraı Qazaqstanda 430 myń tonna iri qara eti óndirildi, bul 2023 jylmen salystyrǵanda 7,5%-ǵa kóp (399,3 myń tonna). Al usaq qara maldyń sany 18 522,6 myń basty qurap, ótken jylmen salystyrǵanda 9,2%-ǵa ósken. Sonymen qatar, respýblıkada 132,8 myń tonna qoı etin óndirgen.
Mınıstrlik sondaı-aq, 2025 jyldyń 1 qańtaryna deıin Qazaqstanda 213 et óńdeıtin kásiporyn jumys istep, olardyń jalpy qýaty jylyna 412 myń tonna etti (qus etin qospaǵanda) quraıtynyn atap ótti. 2024 jyly iri jáne usaq qara maldy óńdeý kólemi 270 myń tonnaǵa jetti, bul 2023 jylmen salystyrǵanda 17%-ǵa kóp (230 myń tonna).
Aýyl sharýashylyǵy mınıstrligi tyıymnyń uzartylýyna baılanysty kelesi sebepterdi alǵa tartty: kórshi elderde iri qara men usaq qara malǵa joǵary suranys baıqalady, bul óz kezeginde shetelge mal shyǵarýdyń artýyna yqpal etedi. Al bul jaǵdaı Qazaqstannyń mal sharýashylyǵy men et ónimderin óńdeý salasynyń damýyna keri áserin tıgizýi múmkin.
Qazaqstanda maldy shetelge shyǵarý tyıymy 2022 jyldan beri kúshinde.