Almaty qalasynyń turǵyndary úshin kitap oqý burynǵydan da qoljetimdi bola tústi. Qalada múmkindigi shekteýli azamattarǵa kitaptardy tegin jetkizý boıynsha pılottyq joba iske qosyldy. Bul týraly Aqshamnews.kz saıty habarlaıdy.
Qazirgi ýaqytta jobaǵa 28 kitaphana qatysýda, al tapsyrys berý prosesi onlaın júzege asyrylady. Oqyrman Almaty kitaphanalarynyń saıtynan qalaǵan kitabyn tańdap, arnaıy anketany toltyryp, múmkindigi shekteýli ekenin rastaıtyn qujatty tirkeýi kerek. Tapsyrys 1–2 kún ishinde óńdelip, oqyrmannyń úıine Iandeks Go servısi arqyly jetkiziledi.
Almaty kitaphanalarynyń dırektory Meıram Bektembaevtyń aıtýynsha, bul bastama qalanyń kitap qorynyń qoljetimdiligin arttyryp, múmkindigi shekteýli jandarǵa kitaphana qyzmetin paıdalanýǵa múmkindik beredi.
"Qazirgi kezeńde bul qyzmetti tek múmkindigi shekteýli azamattar úshin tegin usynyp otyrmyz. Jaz aılaryna qaraı barlyq qala turǵyndaryna qyzmet kórsetý múmkindigin qarastyramyz, biraq bul jaǵdaıda jetkizý aqyly bolady", – dedi Bektembaev.
Yandex Qazaqstan kompanıasy da jobany qoldap, onyń basty maqsaty – adamdardyń ómirin jeńildetý ekenin atap ótti.
"Biz sıfrlyq qyzmetterdi damytamyz, biraq basty nazarymyz – adamdar men olardyń qajettilikteri. Eger osy qyzmet arqyly kitaptardy qoljetimdi ete alsaq, onda bul bizdiń basty maqsattarymyzdyń biri – tehnologıalar arqyly adamdardyń ómirin jaqsartý ekenin kórsetedi", – dedi Iandeks Go Dostavka servısiniń jetekshisi Erjan Bazarbaı.
Pılottyq joba 2025 jyldyń mamyr aıynyń sońyna deıin jalǵasady. Eger bastama suranysqa ıe bolsa, ony basqa sanattaǵy azamattarǵa da keńeıtý múmkindigi qarastyrylady.