2024 jylǵy 19 qarasha kúni Máskeýde Kólik aptalyǵy aıasynda Qazaqstan Respýblıkasynyń Kólik vıse-mınıstri Talǵat Tileýbekuly Lastaev óńirlik jáne halyqaralyq kólik yntymaqtastyǵyn damytýǵa baǵyttalǵan birqatar negizgi is-sharaǵa qatysty, dep habarlaıdy aqshamnews.kz.
Kólik mınıstrliginiń málimetinshe, «TMD plús «Kólik yntymaqtastyǵy: ózara baılanys, turaqtylyq, tıimdilik» plenarlyq talqylaý aıasynda TMD memleketteri men kórshiles óńirler arasyndaǵy kólik baılanystaryn nyǵaıtýdyń negizgi máseleleri talqylandy.
Talǵat Lastaev sózinde júk tasymaldaý kólemin ulǵaıtýǵa, elderdiń tranzıttik áleýetin damytýǵa jáne ekonomıkalyq ıntegrasıany tereńdetýge yqpal etetin turaqty jáne tıimdi kólik júıesin qalyptastyrý mańyzdy ekenin atap ótti.
TMD-ǵa qatysýshy memleketterdiń Úılestirý kólik keńesiniń (ÚKK) 44-shi otyrysynda halyqaralyq logıstıkany damytýǵa atsalysý, kólik salasyn sıfrlandyrý, jolaýshylar tasymaly perspektıvalary, TMD elderi arasyndaǵy odan ári yntymaqtastyq máseleleri qaraldy.
Jıyndaǵy negizgi másele — TMD-ǵa qatysýshy-memleketterdiń Kólik úılestirý keńesiniń (KÚK) ókiletin keńeıtý.
Budan basqa, Vıse-mınıstr EAEO-ǵa múshe-memleketterdiń Kólik salasyndaǵy ýákiletti organdary basshylary keńesiniń 8-shi otyrysyna qatysty. Qatysýshylar Odaqtyń kólik saıasatyn iske asyrýdyń negizgi baǵyttary men kezeńderin, sonyń ishinde kólik dálizderin damytýdy, ınfraqurylym jobalardy iske asyrýdy, kólik jáne logıstıka salasyndaǵy yntymaqtastyqty tereńdetý jónindegi bastamalardy talqylady.
Atalǵan is-sharalar Qazaqstan Respýblıkasynyń ıntegrasıalyq prosesterin nyǵaıtýǵa jáne kólik salasyndaǵy ózara tıimdi yntymaqtastyqty damytýǵa múddeli ekenin kórsetti. Qazaqstan óńirdiń ornyqty ekonomıkalyq ósýine yqpal etetin biryńǵaı kólik keńistigin qurýǵa baǵyttalǵan Strategıalyq jobalardy iske asyrýǵa belsendi qatysýdy jalǵastyrady.