Abaı ýnıversıtetiniń bastamasymen Abaı atyndaǵy ǵylymı-mádenı ortalyq ashyldy
2024 jyldyń 19 qarashasynda Abaı atyndaǵy Qazaq ulttyq pedagogıkalyq ýnıversıtetiniń bastamasymen Semeı qalasyndaǵy Abaıdyń «Jıdebaı-Bórili» memlekettik tarıhı-mádenı jáne ádebı-memorıaldyq mýzeı-qoryǵy bazasynda Abaı atyndaǵy ǵylymı-mádenı ortalyqtyń saltanatty ashylý rásimi ótti, dep habarlaıdy aqshamnews.kz
İs-sharaǵa Qazaqstan Respýblıkasy Mádenıet jáne aqparat mınıstrliginiń, QR Ǵylym jáne joǵary bilim mınıstrliginiń ókilderi, joǵary oqý oryndarynyń basshylary men jetekshi ǵalymdary, belgili qoǵam jáne memleket qaıratkerleri, Abaı oblysy ákimdigi men zıaly qaýym ókilderi qatysty.
Ortalyqty ashýdyń negizgi maqsaty – Abaı ýnıversıteti, «Jıdebaı-Bórili» memlekettik qoryq-mýzeıi jáne «Abaıtaný akademıasy» ǵylymı-zertteý ınstıtýty arasyndaǵy yntymaqtastyqty nyǵaıtý. Bul bastama Abaıdyń sheteldegi ortalyqtarymen baılanysyn keńeıtip, uly oıshyldyń murasyn jastar arasynda nasıhattaýdyń jańashyl tásilderin engizý alańyna aınalýǵa baǵyttalǵan. Abaıdyń «Tolyq adam» tujyrymdamasyn ǵylymı-ádistemelik turǵydan nasıhattaý, onyń shyǵarmalary arqyly óskeleń urpaqty tárbıeleý erekshe nazarda boldy.
Ortalyq qazirgi jahandaný jaǵdaıynda mádenı, oqý-aǵartý jáne ǵylymı jumystar úshin zamanaýı mýzeıdiń múmkindikterin tıimdi paıdalanýǵa baǵyttalǵan. Bul mýzeıge kelýshilerdiń qataryn arttyrýdyń jańa joldaryn izdeýge, ólketaný baǵytyndaǵy mádenı týrızmdi damytýǵa, sondaı-aq mýzeı men ýnıversıtet arasyndaǵy ǵylymı yntymaqtastyqty nyǵaıtýǵa yqpal etpek.
İs-shara barysynda QR Ǵylym jáne joǵary bilim mınıstri Saıasat Nurbektiń quttyqtaý haty oqyldy. Hatta Abaı murasyn zerdeleý, dáripteý jáne nasıhattaýdyń negizgi alańy retinde ortalyqtyń mańyzdylyǵy erekshe atap ótildi.
Abaı ýnıversıtetiniń rektory Bolat Tilep ortalyqtyń ashylýynyń mańyzdylyǵyn atap ótip, uly oıshyldyń murasyn respýblıkalyq jáne halyqaralyq deńgeıde nasıhattaýǵa arnalǵan bastamalar týraly baıandady:
«El Prezıdenti Qasym-Jomart Toqaev uly oıshyl, ulttyq rýhanıattyń temirqazyǵy atanǵan Abaı Qunanbaıulynyń shyǵarmashylyǵyn keńinen nasıhattaýǵa erekshe kóńil bólýde. Abaıdyń «Tolyq adam» ilimi jastardy tárbıeleýde mańyzdy baǵdar bolsa, onyń muralaryn ulyqtaý jáne nasıhattaý jaýapkershiligi onyń esimimen atalatyn mádenıet, óner jáne bilim berý mekemelerine júkteledi. Uly Abaı ǵumyr keshken, qyzmet etken kıeli ólkede ornalasqan «Jıdebaı-Bórili» memlekettik mýzeı-qoryǵynyń bazasynda ǵylymı-mádenı ortalyq ashý biz úshin úlken mártebe», – dedi ol.
Ortalyqtyń ashylýy aıasynda Abaı ýnıversıtetiniń abaıtanýshy ǵalymdary Semeı qalasyndaǵy Álıhan Bókeıhan atyndaǵy ýnıversıtettiń ujymymen kezdesýler ótkizdi. Stýdentter úshin Abaı fılosofıasy, shyǵarmashylyǵy men ilimine arnalǵan ashyq dárister uıymdastyryldy.
Ortalyqtyń ashylýy uly oıshyl Abaı Qunanbaıulynyń murasyn nasıhattaýǵa baǵyttalǵan mańyzdy qadam boldy. Bul bastama mádenıet pen bilim berý salasynda ilgerileýdiń, ult rýhanıatyn jańa deńgeıge kóterýdiń jarqyn kórinisi bolyp tabylady.