Sarapshylardyń pikirinshe, bul eń durys jáne qolaıly nusqa.
Jumys tobynyń otyrysynda Esep bekitildi jáne Qazaqstan Respýblıkasynda UTC+5 biryńǵaı ýaqyt beldeýin engizý usynyldy, dep habarlaıdy Almaty-akshamy.kz
QR Saýda jáne ıntegrasıa mınıstrligi "Qazaqstan Respýblıkasy aýmaǵynda ýaqyt esepteý tártibi týraly" Qazaqstan Respýblıkasy Úkimetiniń qaýlysyna ózgerister ázirledi.
Qujatqa sáıkes, Astana, Almaty, Shymkent qalalarynyń, Abaı, Aqmola, Almaty, Jambyl, Jetisý, Qaraǵandy, Qostanaı, Pavlodar, Soltústik Qazaqstan, Túrkistan, Ulytaý, Shyǵys Qazaqstan oblystarynyń ákimdikteri 2024 jylǵy 29 aqpannan 2024 jylǵy 01 naýryzǵa qaraǵan túni (saǵat 00:00-de) jergilikti ýaqytty 1 saǵatqa artqa aýystyrady.
Osylaısha Qazaqstannyń búkil aýmaǵy 5-saǵattyq beldeýde ornalasady.
Qazaqstan Respýblıkasynda eki ýaqyt beldeýi qoldanylady (UTC+5, UTC+6). Atyraý, Batys Qazaqstan, Mańǵystaý, Aqtóbe jáne Qyzylorda oblystary – 4- saǵat beldeýinde (UTC+4+1). Astana, Almaty, Shymkent qalalary jáne qalǵan oblystar (Qostanaı, Soltústik Qazaqstan, Aqmola, Qaraǵandy, Ulytaý, Túrkistan, Jambyl, Pavlodar, Shyǵys Qazaqstan, Abaı, Jetisý, Almaty) 5-saǵat beldeýine (UTC+5+1) jatady.
Bul rette, búgingi kúni Qazaqstan Respýblıkasy azamattarynyń edáýir bóligi (Qostanaı, Aqmola, Soltústik Qazaqstan, Qaraǵandy, Pavlodar, Almaty, Túrkistan, Jambyl, Ulytaý, Jetisý jáne Abaı oblystarynyń, Astana jáne Almaty, Shymkent qalalarynyń turǵyndary) óziniń geografıalyq ýaqytynan ozyp-UTC+6 ákimshilik ýaqyt beldeýi boıynsha ómir súredi. Aýmaqtyq kórsetilgen aımaqtar UTC + 5 ýaqyt beldeýinde ornalasqan.
Bul máseleni keshendi pysyqtaý maqsatynda Qazaqstan Respýblıkasynyń Saýda jáne ıntegrasıa mınıstrligi janynan tıisti jumys toby quryldy, onyń quramyna 60-tan astam múshe, onyń ishinde Qazaqstan Respýblıkasy Parlamentiniń depýtattary, ortalyq jáne jergilikti memlekettik organdardyń kópshiligi, ǵylymı ınstıtýttar, medısınalyq joǵary oqý oryndary men qoǵam qaıratkerleri kirdi.
Jumys tobynyń bastamashyl músheleri "Qazaqstan Respýblıkasyndaǵy ýaqytty esepteýdi zertteýdiń negizgi nátıjeleri" esebin daıyndady, onda ýaqyt beldeýlerin retteý nemese olardy kún (tabıǵı) ýaqytpen úndestirý halyqtyń densaýlyǵyna, ekonomıkaǵa, bilimge, qaýipsizdikke jáne qorshaǵan ortaǵa aıtarlyqtaı áser etetindigi atap ótiledi.
Ozyq ýaqyttyń áleýmettik saldarlary – adamnyń sozylmaly uıqysynyń qanbaýy, ımýnıtettiń, fızıkalyq jáne aqyl-oı belsendiliginiń tómendeýine ákep soǵady.
2024 jylǵy 1 jeltoqsandaǵy jumys tobynyń otyrysynda qaraý nátıjesinde Esep bekitildi jáne Qazaqstan Respýblıkasynda UTC+5 biryńǵaı ýaqyt beldeýin engizý usynyldy. Sarapshylardyń pikirinshe, bul nusqa eń durys jáne qolaıly nusqa bolyp tabylady, Qazaqstannyń kóptegen óńirleri úshin tabıǵıǵa jaqyn ýaqytty paıdalanýǵa múmkindik beredi.
Túzetýler jobasy 2023 jylǵy 22 jeltoqsanǵa deıin qoǵam bolyp talqylaý úshin Ashyq NQA portalynda jarıalandy.