Almatyda «Qazaqstan halqyna» qory 11,9 mlrd teńge kólemindegi qaıyrymdylyq jobany júzege asyrýda
Keshe Almatyda qala ákiminiń orynbasary Ásem Núsipovanyń, «Qazaqstan halqyna» qorynyń basqarma tóraǵasy Bolat Jámishevtiń, qor tóraǵasynyń orynbasary Lázzat Shyńǵysbaevanyń jáne qoǵamdyq uıymdar men jergilikti atqarýshy organdar ókilderiniń qatysýymen «Qazaqstan halqyna» qorynyń qyzmeti óńirler úshin» atty «dóńgelek ústel» ótti.
Qor tóraǵasynyń aıtýynsha, bul basqosý Ulttyq qaıyrymdylyq boıynsha II konferensıanyń aıasynda óńirdiń qaıyrymdylyq baǵdarlamalary men jobalaryn iske asyrý jónindegi bastamalardy talqylaý men aıqyndaý maqsatynda uıymdastyrylǵan. Bolat Jámishev jıynda «Qazaqstan halqyna» qorynyń júzege asyrǵan qaıyrymdylyq bastamalaryna keńirek toqtalyp, Almatyda iske asqan jáne josparlanǵan jobalardy tanystyrdy.
«Qor qazaqstandyqtardyń densaýlyq saqtaý, bilim berý, áleýmettik qoldaý, mádenıet jáne sport salalaryndaǵy negizgi máselelerin sheshýge baǵyttalǵan jalpy somasy 146,5 mlrd teńge bolatyn 40-tan astam qaıyrymdylyq baǵdarlama men jobany qarjylandyrady. Sondaı-aq, tótenshe jaǵdaılar kezinde zardap shekken azamattarǵa kómek kórsetemiz. Almaty qalasynda jalpy somasy 11 mlrd 944 mln teńgege 12 qaıyrymdylyq joba men baǵdarlama iske asyrylýda. Búgingi tańda onyń ishinde 4 mlrd 26 mln teńgeden astam somaǵa kómek kórsetildi, quny 7 mlrd 918 mln teńge bolatyn jobalardy júzege asyrý josparlanǵan», – dep atap ótti Bolat Jámishev.
Densaýlyq saqtaý salasynda Almaty qalasynda jalpy somasy 4,2 mlrd teńgege dári-dármek satyp alý josparlanǵan, onyń ishinde ómirge qaýip tóndiretin jáne orfandyq aýrýlary bar 33 pasıent úshin jalpy somasy 3,7 mlrd teńgege dári-dármek satyp alyndy. Qosymsha 489,3 mln teńge somaǵa preparat satyp alý josparlanǵan. Bir naýqas RF emdeýge jiberildi. Tamyrly patologıasy bar 4 balaǵa tegin medısınalyq kómek kórsetildi. Al shuǵyl túrde qasań qabyqty transplantasıalaýǵa muqtaj almatylyq 15 pasıentke kózdiń qasań qabyǵy aýystyryldy.
Sondaı-aq, bıyl qalada Erte aralasý ortalyǵyn ashý josparlanýda. Ortalyqta neıro-ortopedıalyq buzylysy bar jáne 3 aıdan 3 jasqa deıingi balalar keshendi ońaltý kómegin alatyn bolady.
Onkologıalyq qyzmetti damytý sheńberinde «Qazaq onkologıa jáne radıologıa ǵylymı-zertteý ınstıtýty» AQ-ny jalpy somasy 6,9 mlrd teńgege jabdyqtarmen jaraqtandyrý josparlanýda. Balalar neırohırýrgıalyq qyzmetin damytý maqsatynda «Balalar shuǵyl medısınalyq kómek ortalyǵy», №2 Balalar qalalyq klınıkalyq aýrýhanasy, Pedıatrıa jáne balalar hırýrgıasy ǵylymı ortalyǵyna jalpy kólemi 222,2 mln teńgege jabdyqtar jetkizý josparlanýda.
Áleýmettik qoldaý salasynda Qor Almatynyń 15 turǵynyna jalpy somasy 133,2 mln teńgege ınovasıalyq protezder, al tirek-qımyl apparaty buzylǵan bir balaǵa quny 9 mln teńgege ekzoskelet satyp aldy.
Erekshe bilim berý qajettilikteri bar balalarǵa arnalǵan arnaıy mektepterdi jaraqtandyrý sheńberinde Almatyda ornalasqan elimizdiń barlyq arnaıy mektepteriniń jumysyn úılestiretin «Arnaıy jáne ınklúzıvti bilim berýdi damytýdyń Ulttyq ǵylymı-praktıkalyq ortalyǵy» jaraqtandyryldy. Jalpy somasy 210,2 mln teńgege 7 qalalyq arnaıy mektepti jabdyqtaý josparlanǵan.
Almaty qalasy boıynsha Qordyń bilim berý granttary baǵdarlamasy boıynsha 35 JOO-da halyqtyń áleýmettik osal toptarynan shyqqan 860 stýdent oqıdy.
Sondaı-aq, Qor qaıǵyly qańtar oqıǵasy barysynda zardap shekken 684 adamǵa jalpy somasy 2,5 mlrd teńgege qaıyrymdylyq kómek kórsetti. Onyń ishinde Almaty qalasy boıynsha 247 zardap shekken azamatqa qoldaý kórsetildi.
Almatyda Qordyń qoldaýymen erekshe qajettilikteri bar balalarǵa arnalǵan «Jas jaýynger» beıimdeý sportynyń dene shynyqtyrý-saýyqtyrý klýby jumys isteıdi. 10 paraportsmen úshin sporttyq-júgirý protezderi daıyndaldy, sondaı-aq mamyr aıynda qalada paraatletterge arnalǵan QR-daǵy alǵashqy júgirý mektebi iske qosyldy.
Kezdesý qorytyndysynda Almaty qalasy ákiminiń orynbasary Ásem Núsipova basty mindet qala turǵyndarynyń sapaly jáne qoljetimdi qyzmetterdi alýda jańa múmkindikterge ıe bolýy úshin barlyq jaǵdaı jasaý ekenin atap ótti. Osyǵan baılanysty qala ákimdigi densaýlyq saqtaý, bilim berý jáne áleýmettik qoldaý salasyndaǵy jańa qaıyrymdylyq jobalardy iske asyrý úshin Qormen tyǵyz jumys isteýge árkez daıyn.