Bıyl elimizdiń mýzyka óneri úshin mańyzdy oqıǵa – Qurmanǵazy atyndaǵy Qazaq ulttyq konservatorıasynyń 80 jyldyq mereıtoıy ótedi.
Konservatorıa mereıtoıyn kóptegen óner maıtalmandary atap ótti. Olardyń qatarynda skrıpkashy Marat Bısenǵalıev, baıanshy Yves Moulin, opera ánshisi Talǵat Musabaevtar úlken konsertter qoıyp, bolashaq juldyzdarǵa sheberlik sabaqtaryn júrgizdi, dep habarlaıdy aqshamnews.kz Mádenıet jáne aqparat mınıstrliginiń baspasóz qyzmetine silteme jasap.
Seksen jylda konservatorıa Qazaqstandy álemge tanytqan mýzykanttardyń birneshe býynyn tárbıelep shyǵarǵan ordaǵa aınaldy. Qara shańyraq túlekteriniń arasynda Bıbigúl Tólegenova, Álibek Dinishev, Iýrıı Klýshkın, Alan Bóribaev, Baıǵalı Serkebaev, Medet Shotabaev sıaqty Qazaqstannyń halyq ártisteri, Eńbek sińirgen qaıratkerleri men daryndy mýzykanttar bar.
Konservatorıa 25 qarasha men 2 jeltoqsan aralyǵynda ótetin mereıtoılyq marafonǵa barsha kórermenin shaqyrady. Kún saıyn qazaqstandyq mýzykanyń baı tarıhy, zamanaýı jetistikteri kórsetiledi. Baǵdarlamada halyqaralyq konferensıa, kórmeler jáne basqa da kóptegen is-sharalar josparlanǵan.
Qazaqstannyń jetekshi mýzykanttary tájirıbesin bólisý úshin sheberlik sabaqtary men kezdesýler ótkizedi. Olardyń qatarynda Qazaqstannyń halyq ártisi Aıman Musahodjaeva, Reseı skrıpkashysy Nazar Kojýhar, qazaqtyń daryndy dırıjerlary Alan Bóribaev pen Abzal Mýhıtdınov, QR Eńbek sińirgen qaıratkeri Nurlan Izmaılov jáne t.b. bar.
Mereıtoılyq marafon 3 jeltoqsan kúni Respýblıka saraıynda ótetin gala-konsertpen qorytyndylanady. Qazaqstannyń eń bedeldi sahnasynda konservatorıanyń shyǵarmashylyq ujymdary – orkestrler, ansámblder, hor jáne solıser, sondaı-aq qonaq retinde shaqyrtylǵan ártister jınalady. Bul kesh urpaqtar arasyndaǵy baılanysty, mýzykalyq dástúrlerdiń baılyǵy men qazaqstandyq ónerdiń zamanaýı úlgisin kórsetetin mereıtoıdyń qorytyndysy bolmaq.
Mereıtoılyq marafon baǵdarlamasyn konservatorıa saıtynan kórýge bolady.