Qazaq sportshylarynyń Olımpıadada kıetin kıimi tanystyryldy

Avtor Almaty-akshamy.kz.
11:55, 18 sáýir 2024

Sýret: QR Týrızm jáne sport mınıstrligi

Májilistiń Áleýmettik-mádenı damý komıtetiniń otyrysynda Týrızm jáne sport mınıstrligi sport jáne dene shynyqtyrý isteri komıtetiniń tóraǵasy Erbol Myrzabosynov Májilis depýtattaryna Qazaqstan sportshylarynyń Parıj Olımpıadasyna kıip baratyn kıim úlgilerin tanystyrdy.

«Azıa oıyndarynan keıin birqatar suraq týyndaǵan bolatyn. Sonyń negizinde BAQ ókilderine, qoǵamdyq uıym, sportshylardan arnaıy komısıa qurylyp, jumys istedi. Eń birinshi nusqa — Tý ustap shyǵatyn Aslanbek Shymbergenov pen Nadejda Dýbovıskaıanyń kıimi. Ekeýi de ulttyq naqyshta tigiledi. Er adamnyń kıiminde bórik bolsa, qyzda sáýkele bar. Arnaıy komısıaǵa 15 uıymnyń ótinimi tústi. Sol 15 ótinimnen tańdap alyndy. Al qalǵan sportshylarymyz paradqa kıip shyǵatyn forma klasıkalyq úlgide bolady. Ol kezde Parıjde 40 gradýsqa deıin ystyq bolatynyn bilesizder. Aýanyń ylǵaly da joǵary. Sondyqtan arnaıy matadan jeńsiz nusqasy tigiledi. Er sportshylardyń basynda taqıa, qyzdar formasynyń bir úlgisinde shalbar, ekinshi nusqasynda ıýbka bolady. Eki nusqasy da bolady», — dedi ol.

Komıtet basshysy bıyl sportshylardyń olımpıadalyq formasy taǵy bir túrmen tolyqqanyn atady.

«Sonymen birge paradtyq sport formasy bar, sportshylarymyz marapattaý rásiminde kıedi. Onyń da er balalarǵa jáne qyzdarǵa arnalǵan nusqasy bar. Sondaı-aq, sporttyq forma bar. Buǵan deıin sport formasy men paradtyq sport formasy bireý bolatyn. Qazir biz sportshylarǵa yńǵaıly bolý úshin sheteldik brend Joma-dan tolyq 16 nusqaly kıim alyp beremiz. Ony sportshylar jolda, daıyndyq kezinde kıedi. Bul ózi jaqsy matadan jasalǵan, halyqaralyq brend. Azıa oıyndarynyń qorytyndysy boıynsha, sportshylardyń talap-tilekterine taldaý jasap, sonyń negizinde halyqaralyq brendke tapsyrys berdik. Búkil forma demeýshilerdiń esebinen alynady. 15 nusqadan osy úlgi tańdap alyndy. Endi tige bastaımyz. Bul joly bul kıimderdi sportshylarǵa oıyndardyń bastalýyna 35 kún qalǵanda taratamyz», — dedi Erbol Myrzabosynov.