Almaty qalasy Áýezov aýdanynyń mektepteri qala tazalyǵyna atsalysýda. «Almaty – bizdiń ortaq úıimiz» aksıasy aıasynda №104 Jalpy bilim beretin mektep pen №202 mektep-gımnazıasynda tabıǵatty qorǵaý sharasy ótti.
Tazalyq aksıasyna 600-ge jýyq mektep oqýshylary belsene qatysty. Mektep aýlasy qoqystan tazartyldy. Oqýshylar aǵash kóshetteri men gúlder otyrǵyzyp, jasyl jelekterdi zıankesterden qorǵaý úshin túpterin áktedi. Egilgen aǵashtardy sýǵardy da umytpady. Tabıǵatqa degen mahabbattary artqan oqýshylar, aınalasyn endi lastamaıtyndaryn aıta ketti.
– Bizdiń negizgi maqsatymyz – elimizge sanaly ári tárbıeli urpaq ósirý. Osy oraıda, bul sharany oqýshylardyń ekologıalyq jáne tazalyq mádenıetin qalyptastyrý maqsatynda uıymdastyrdyq. «Almaty – bizdiń ortaq úıimiz» aksıasy aıasynda bilim ordamyzda ártúrli sharalar ótkizilýde. Oqýshylar mektebimizdiń aınalasyn kórkeıtýge óz úlesterin qosýda. Bul, árıne qýantarlyq jaǵdaı. Sebebi, keleshek urpaǵymyz tabıǵatyn súıetin azamat bolyp qalyptasýda. Qazir oqýshylardyń arasynda arnaıy eko-saqshylar da bar. Olar, mekteptiń ishi men syrtyndaǵy tazalyqqa jaýap beredi. Mundaı sharalar olardyń qorshaǵan ortaǵa degen mahabbatyn arttyrary sózsiz, – dedi №104 jalpy bilim beretin mekteptiń tárbıe isi jónindegi orynbasary Maıgúl Orazyhanova.
– Barlyǵymyz biletin bizdiń qoǵamda tazalyq mádenıeti tómen deńgeıde. Bul aksıa bastalǵaly baıqaǵanymyz, barlyq qala turǵyndary tabıǵatty aıalaýǵa júıeli túrde jumys jasaýda. Bundaı jaqsy sharalar, bir aı ǵana emes jıi bolyp tursa deımiz. Maqsat – balalardy mektep qabyrǵasynan tazalyqqa, tabıǵatty qorǵaýǵa úıretý. Osy oraıda, ár aptanyń beısenbi kúnin tazalyqqa arnadyq. Ol kúni oqýshylar, óz synyptaryn, mekteptiń aınalasyna tazalyq jumystaryn júrgizedi. Osylaısha, balalar bul istiń qanshalyqty mańyzdy ekenin túsinedi. Búgingi sharada, mektep túlekteri men joǵarǵy synyp oqýshylary aǵashtar otyrǵyzdy. Keıbir balalar ózderi gúlder ákelip otyrǵyzdy. Bul bizdiń durys baǵytta jumys jasap jatqanymyzdy kórsetse kerek. Balalar birden bolmasa da, ýaqyt óte kele tazalyq mádeneıtin boılaryna sińdiretinine senimdimiz, – deıdi №202 mektep-gımnazıa dırektory Bolat Janaıhanuly.
Tazalyq mádenıetin qalyptastyrýǵa arnalǵan sharaǵa muǵalimder men oqýshylardan bólek, ata-analar da qatysty. Olar balalarǵa aǵash pen gúldi qalaı durys otyrǵyzýdyń tehnologıalaryn úıretti. Rıta Bakırova esimdi turǵynnyń aıtýynsha, bundaı is sharalar balanyń eline degen súıispeshiligin arttyrady. Qorshaǵan ortasyn lastamaýǵa, taza ustaýǵa tárbıeleıdi. Biz balalarǵa úlgi kórsetsek, olar da bizdiń istegenimizdi jasaıdy. Sondyqtan, bul oqýshylardyń ǵana jumysy emes, barlyq qala turǵyny atsalysatyn aksıa.
№104 jalpy bilim beretin mekteptiń 10 synyp oqýshysy Symbat Maratqyzy aınalasynyń taza bolǵanyn unatady eken.
– Jalpy bundaı is-sharalar mektebimizde jıi ótkizilip turady. Óz basym tazalyqty jaqsy kóremin. Sondyqtan, mektep aınalasynyń da taza bolyp turǵanyn qalaımyn. Bir qýanatynym, bizdiń artymyzdan ergen kishi synyp oqýshylary da bir úıidń balasyndaı jumylýda. Biz olarǵa úlgi bolǵanymyzǵa qatty qýanyshtymyz, – deıdi mektep prezıdenti Symbat Maratqyzy.