Jambyl atyndaǵy Qazaq memlekettik fılormonıasynda Nurǵısa Tilendıev atyndaǵy akedemıalyq fólklorly-etnografıalyq «Otyrar sazy» orkestiriniń «Darıǵa, dombyramdy bershi maǵan!» atty konserti bolyp ótti.
Nurǵısa Tilendıev kózi tirisinde dástúrli ónerdi óltirmes úshin «Otyrar sazy» orkestirin óz qolymen qurǵany belgidi. Dara talanttyń kózi ketken soń, orkestirdiń taǵdyryna senimsizdik tanytqandar da boldy. Biraq, halqy barda saf óner jalǵasyn taýyp, orkestr eseptik konsertin jyl saıyn berip otyrýdy úrdiske aınaldyrdy. Bul joly da ǵasyrdan-ǵasyrǵa jetip jatqan óner ıesi Nurǵısa Tilendıevtiń shyǵarmashylyǵyna arnalǵan keshti tamashalaýǵa kelgen kórermenniń qarasy qalyń boldy. Saǵynyshqa toly kesh N.Tilendıevtiń «Ata tolǵaýy» kúıimen ashyldy.
Jalpy, bul jolǵy keshtiń ózindik ereksheligi- baǵdarlamada Nurǵısa Tilendıev pen onyń ómirlik qosaǵy bolǵan Darıǵa Tilendikelininiń aqyn Muqaǵalı Maqataevtyń óleńderine jazylǵan ánderi ǵana oryndaldy. Konsertke aqıyq aqynnyń da urpaqtary qatysyp otyrdy. Osylaısha «tondemniń» áserli áýeni, syrly sazy kezektese oryndalyp, tyńdarmanyn syrly álemge jetelep, keremet kúıge bóledi.
- Birde bizdiń úıge Muqaǵalı Maqataev keldi. Muqaǵalı Nuraǵańdy syrttaı jaqsy bilgenimen, ekeýi jaqyn tanys emes eken. Biraz áńgimeden soń, Nuraǵań «Dah, dombyramdy bershi. Muqaǵalıǵa kúı oryndap bereıin»,- degeni. Áli esimde «Aqqýdy», sosyn « Álqısany» tartty. Erteńine Muqaǵalı «Darıǵa, dombyramdy bershi maǵan» degen óleńin jazyp ákeldi. Sózin oqyp shyqqan Nuraǵan dereý án jazdy. Jáı ǵana áýen emes, klasıka!. Sodan ekeýi bir aı boıy án shyǵardy. Muqaǵalı qaıtys bolarynan biraz kún buryn «Esińe meni alǵaısyń» degen ólenin jazyp, Nuraǵańa tastap ketken eken. Oǵan da án jazdy. Jalpy, Nuraǵań ketken soń, men úshin saǵynyshqa toly kezeń bastaldy. Ol kisi 1998 jyly qaıpas saparǵa attansa, men 2000 jyldan bastap óz-ózimnen mýzyka jazyp kettim. Bul da bir allanyń qudireti shyǵar. Mýzyka týǵan saıyn jaza berdim. Meniń oıymsha bul tekke emes, Nuraǵań kókten jiberip jatyr- aý,-deıdi Qazaqstannyń eńbek sińirgen ártisi Darıǵa Tilendikelini.
Iá, erekshe daryn ıesi N.Tilendıevtiń bizdiń aramyzdan ketkenine de biraz ýaqyt ótken eken. Osynaý ýaqyt ishinde Nuraǵańnyń kózindeı bolǵan «Otyrar sazy» óz bıiginen bir saty da tómendegen emes. Qaıta onyń óneri has talanttyń ór minezindeı tasyp, bıiktep barady. İzin basqan urpaǵy Dinzýhrasy barda Nurǵısa Tilendıevtiń otynyń óshpesi, óneriniń ólmesi anyq.