Óńirlerdegi kitaphanalarǵa da jiberiledi
Mádenıet jáne sport mınıstrligi Geraldıkalyq zertteýler ortalyǵy men Ulttyq akademıalyq kitaphana arasynda eki jaqty memorandýmǵa qol qoıyldy, dep habarlaıdy Almaty-akshamy.kz BAQ.KZ-ke silteme jasap.
«Eki mekemeniń rýhanıat salasynda atqaryp jatqan jumystarynyń máni men maqsaty bir. El azamattary arasynda patrıotızmdy nasıhattaý, otansúıgishtikti dáripteý baǵytynda aldaǵy ýaqytta birlikte jumys atqaramyz. Osy rette búgingi eki jaqty memorandým aldaǵy ýaqytta óziniń jemisin berip, sátti jobalardy júzege asyrýǵa sep bolady degen senim bar», – dedi Ulttyq akademıalyq kitaphanasy basshysynyń mindetin atqarýshy Nurjan Joldybalınov.
Eki jaqta memorandým aıasynda tıisti kelisimge kelip, aldaǵy ýaqytta iske asyrylatyn ortaq jobalarǵa birge atsalysatynyn málimdedi.
«Tarıh salasyndaǵy ǵalymdarymyzben birge qazir «Qazaq geraldıkasy» kitabyn shyǵardyq. Geraldıkanyń ózi - ótken ómirimizdiń nemese ótken ǵasyrlarymyzdyń tarıhy. Qazirgi tańda osy nyshandardyń keıbiri qoldanylyp júr. Umyt bolǵan geraldıkalyq belgilerdi, ıeroglıfterdi búginde ǵalymdarymyz zerttep jatyr», - dedi Geraldıkalyq zertteýler ortalyǵynyń dırektory Asylbek Baıjumauly.
Shara aıasynda Geraldıkalyq zertteýler ortalyǵynyń dırektory Ulttyq akademıalyq kitaphanaǵa eki júz dana «Qazaq geraldıkasy» kitap-albomyn tabystady. Nurjan Nurlanuly óz alǵysyn bildirip, bul zertteý eńbeginiń óńirlerdegi kitaphanalarǵa da jiberetinin aıtty.
Ejelgi nyshandar men tańbalar qamtylǵan kitapta ǵalymdar ǵun zamanynan beri tasqa qashalǵan tańbalardyń qazaq eliniń eltańbasyna aınalýynyń tarıhı mán-mańyzy baıandalǵan.