Jyl saıyn elimizdegi mektepterdi 150 myńǵa jýyq oqýshy 11 synypty bitirip shyǵady. Ádette úlken ómirge qadam basqaly turǵan joǵary synyp jetkinshekterin jıi tolǵandyratyn máselelerdiń biri – mamandyq tańdaý. Sondyqtan "Kim bolasyń?" degen suraqqa árkim ártúrli jaýap beredi.
Er balalar kóbinese áskerı adam bolýdy qalap, joǵarǵy áskerı oqý oryndaryna jol tartyp jatady. Sonyń ishinde keıbiri Qazaqstan Respýblıkasy Ulttyq ulanynyń Áskerı ınstıtýtyn tańdaıdy. Áskerı ınstıtýt 1997 jyly qurylǵan bolatyn. Sol jyldardan bastap ınstıtýt túlekteri qoǵamdyq tártipti jáne memleketimizdiń aýmaqtyq tutastyǵyn qamtamasyz etýge atsalysyp keledi. Ulttyq ulannyń Áskerı ınstıtýty qurylǵannan beri 4000-ǵa jýyq ofıser daıyndalǵan. 49 túlek ınstıtýtty altyn medalmen támamdap, 270 túlek úzdik dıplommen bitirgen.
Bekzat SOPYBEK,
Ulttyq ulan Áskerı ınstıtýtynyń 4-kýrs kýrsanty:
– Men osy irgeli Áskerı ınstıtýtta bilim alyp jatqanymdy maqtan etemin. Sebebi, bul bilim ordasynan jan-jaqty shyńdalyp shyǵasyń. Instıtýt túlekteri tek Ulttyq ulannyń bólimderinde ǵana emes, Qorǵanys mınıstrliginiń bólimderinde, Ulttyq qaýipsizdik komıteti Shekara qyzmetinde, Tótenshe jaǵdaı mınıstrliginde, Memlekettik kúzet qyzmetinde, İshki ister mınıstrligi men Ulttyq qaýipsizdik komıtetiniń arnaıy maqsattaǵy bólimshelerinde de qyzmet atqarýda. 130-dan astam ofıser-túlek «Búrkit» arnaıy maqsattaǵy bólimshelerinde eńbek etedi, olardyń 41-i kúreń beretti kıip júrýge quqyly.
Búgin bizdiń elimizdiń basshylyǵy Áskerı ınstıtýttyń oqý-ádistemelik bazasyn odan ári damytý jáne oqý ornyn Qazaqstan Respýblıkasy Ulttyq ulany Akademıasyna qaıta daıarlaý máselesin qarastyrýda. Bul bizge joǵary oqý ornynan keıingi bilim berý baǵdarlamasy (magıstratýra, doktorantýra) boıynsha áskerlerimiz úshin kadrlar daıarlaýǵa múmkindik beredi.
Túlekterdiń arasynan Birimjanov Mıras, Baıymbetov Erlan, Samat Qadyrbekov, Tinálın Ámir, Azamat Nurpeıisov sekildi kıkboksıńten álem chempıondary shyǵyp, qazirgi tańda jas býyndy tárbıeleýde. «Arbanyń aldyńǵy dóńgelegi qalaı júrse, sońǵysy da sol baǵytqa bet alady» demekshi, qazirgi kúni oqyp jatqan kýrsanttardyń arasynda da jekpe-jek tóbelesinen álem chempıony, qatardaǵy jaýynger Arapbaı Saýran, pankratıonnan álem chempıony, qatardaǵy jaýynger Zýbaırov Nıaz bar.
Biz qaı kezde de, qandaı jaǵdaıda da Táýelsiz Qazaqstannyń qalqany bolýǵa daıynbyz!
Serikbol SÁRSENBAI,
Áskerı ınstıtýttyń 4-kýrs kýrsanty:
– Mektep qabyrǵasynda júrgen kezimde ofıser bolamyn dep ishteı sheship te qoıǵan bolatynmyn. Oqýǵa túsý úshin ǵalamtordy sharlap, qajetti málimetterdi erinbeı-jalyqpaı izdestirip, qujattardy jınastyryp, ulttyq biryńǵaı testileý tapsyryp, Petropavl qalasyndaǵy Qazaqstan Respýblıkasy Ulttyq ulanynyń Áskerı ınstıtýtyna oqýǵa tústim. Mine, kózdi ashyp-jumǵansha qazir 4-kýrsta oqyp jatyrmyn. Áskerı ınstıtýtta kýrsanttardyń sapaly bilim alýyna tolyqtaı jaǵdaı jasalǵan. Instıtýt oqý-materıaldyq bazasymen, qarý-jaraqpen jáne tehnıkamen jaraqtandyrylǵan. Dalalyq jaǵdaıda jattyǵý jasaý úshin oqý ortalyqtary men atys alańdary da bar. Óz kezeginde túlekter oqýdy aıaqtap, áskerı bólimderge kelgende, is júzinde jınaǵan tájirıbesin qınalmaı qoldanýyna negiz bar ekendigin bildiredi.
Búginde munda, 4-kýrsta Almaty qalasynan kelgen Bekzat Sopybek, Dáýir Moldahmet, Elaman Nurpeıisov sekildi kýrsanttar bilim alyp jatyrmyz. Maqsatymyz – elimizdiń ulttyq qaýipsizdigi men qoǵamdyq tártibin qamtamasyz etý úshin biz de bir kirpishi bolyp qalanyp, memleketimizdiń gúldenýi jolynda adal eńbek etý. El senimin aqtaý. Halqymyzdyń tynyshtyǵy men beıbit ómirin kúzetýde kirpik qaqpaı turǵan Ulttyq ulanymyzdyń abyroıyn asqaqtatý.
Elimizde oryn alǵan keshegi aýyr kúnderde qaýipsizdigimizge qalqan bola bilgen qaısar áriptesterime rızashylyǵym sheksiz.