Memleket basshysy Qasym-Jomart Toqaev Almaty oblysy men Almaty qalasy ákimderiniń esebin tyńdady. Bul týraly Prezıdenttiń baspasóz hatshysy málim etti, dep habarlaıdy almaty-akshamy.kz
Prezıdentke Almaty oblysynyń bıylǵy birinshi jartyjyldyqtaǵy áleýmettik-ekonomıkalyq damýy jóninde telefon arqyly baıandaldy.
Amandyq Batalovtyń aıtýynsha, negizgi salalardyń barlyǵynda ósim qamtamasyz etilip, qysqa merzimdi ekonomıka kórsetkishi 109,4 prosent bolǵan.
Qasym-Jomart Toqaevqa aımaqtaǵy epıdemıologıalyq jaǵdaı týraly málimet berildi. Oblys ákimi sońǵy apta ishinde koronavırýs indetin juqtyrǵandardyń sany 1 paıyzdan aspaǵanyn jetkizdi. Óńirde 4 myń tósek-oryn qarastyrylǵan. Juqpaly indet stasıonarynyń 55,8 paıyzynda, jansaqtaý bólimderindegi oryndardyń 13 paıyzynda naýqastar em qabyldap jatyr.
Memleket basshysy sonymen qatar turǵyndardy aýyz sýmen qamtamasyz etý týraly málimet aldy. Ákim oblysta ortalyqtandyrylǵan sýmen qamtý 98,3 paıyz bolǵanyn jáne bul elimiz boıynsha eń joǵarǵy kórsetkishterdiń biri ekenin aıtty. Bıyl 7 aýylǵa sý qubyryn tartyp, 11 eldi mekendi taza aýyz sýmen qamtý arqyly kórsetkishti 99,5 paıyzǵa jetkizý josparlanyp otyr. Bul jobaǵa 10,9 mıllıard teńge qarjy qarastyrylǵan. Aldaǵy bes jyldyń ishinde taǵy 33 aýyl aýyz sýmen qamtamasyz etilip, 72 eldi mekende jelilerdi qaıta qalpyna keltirý jumystary júrgiziledi.
Prezıdentke Amandyq Batalov Úsharal qalasyndaǵy áýejaıdyń ushyp-qoný jolaǵyn jóndeý jumysynyń, Alakól jaǵalaýyndaǵy sý tazartý qurylǵylary qurylysynyń bastalǵanyn jáne aýyl ákimderi saılaýynyń qorytyndysy týraly aıtty.
Qasym-Jomart Toqaev buqaralyq sportty damytýǵa jáne ish ki týrızmdi ilgeriletýge erekshe kóńil bólýdi tapsyrdy. Budan keıin Memleket basshysy Almaty qalasynyń ákimi Baqytjan Saǵyntaevpen shahardaǵy koronavırýs indetiniń taralýyna qarsy atqarylyp jatqan sharalar men qalanyń ınfraqurylymyn damytý máselelerin telefon arqyly talqylady. Baqytjan Saǵyntaevtyń aıtýynsha, «delta» shtamynyń taralýyna baılanysty Almaty qalasyndaǵy epıdemıologıalyq jaǵdaı kúrdeli bolyp tur. Ótken aptada indet juqtyrý 1,4 ese artyp, 7 936-dan 10 805-ke jetken. Bir táýlikte vırýs juqtyrý 1,4 prosentke kóbeıgen. Sońǵy táýlikte jańadan 1558 naýqas tirkelse, olardyń 1480-inde indettiń belgileri bar.
Naýqastar sanynyń artýyna baılanysty qosymsha juqpaly aýrýlar aýrýhanalary ashylýda. Qazir 7625 naýqas em qabyldap jatyr, 2400 oryndyq tósek-oryn qory jasaqtaldy. Qalanyń dárihana jelisin dári-dármekpen qamtamasyz etý maqsatynda 5 mıllıard teńge kóleminde turaqtandyrý qory quryldy. 68 túrli dári-dármektiń qajetti mólsheri jasaqtaldy.
Qalanyń medısınalyq uıymdary dári-dármek pen jeke qorǵanysh quraldarynyń eki aılyq qorymen qamtamasyz etilgen.
Turǵyndarǵa jappaı ekpe salý jalǵasyp jatyr. Qalada 167 vaksına salý pýnkti jumys istep tur. 4 tamyzdaǵy jaǵdaı boıynsha 740 487 adamǵa ekpeniń birinshi komponenti, 545 954 turǵynǵa ekinshi komponenti salynǵan.
Memleket basshysy Almaty qalasynyń ákimine koronavırýs indetiniń taralýyna jol bermeý boıynsha jumysty kúsheıtýdi jáne shekteý sharalarynyń saqtalýyn qatań baqylaýǵa alý jóninde tapsyrma berdi.
Áńgimelesý barysynda Baqytjan Saǵyntaev Qasym-Jomart Toqaevqa Naýryzbaı aýdanyna qosylǵan yqsham aýdandardaǵy turǵyndardy sapaly aýyz sýmen qamtamasyz etý jáne Abaı dańǵylyn qala shekarasyna deıin uzartý jóninde baıandady. Sonymen qatar qalanyń tarıhı ortalyǵyndaǵy qurylystardy shekteý máseleleri kóterildi.