Ustaz Abylaı Maranulynyń muǵalim qyzmetin atqaryp kele jatqanyna 11 jyl boldy, ol mektepte hımıa páninen sabaq beredi. Osy ýaqyt ishinde ustaz halyqaralyq ıntellektýaldyq saıystardyń 10-nan astam jeńimpazyn tárbıelep shyǵardy. Bıyl onyń shákirtteriniń biri Madıar Qasymáli hımıadan bedeldi IChO halyqaralyq olımpıadasynda altyn medal jeńip aldy, dep habarlaıdy Almaty-akshamy.kz Inform.kz-ke silteme jasap.
«Abylaı Samatov talapshyl bolsa da, óte meıirimdi ustaz. Ol bizge únemi qoldaý bildirip, baǵyt kórsetip otyrady. Ol qarapaıymdylyq, eńbeksúıgishtik sıaqty qasıetterdi boıymyzǵa sińirdi. Abylaı Maranuly bizge moraldyq qoldaý kórsetip, bizben teń dárejede sóılesedi. Ol da mektepte oqyp júrgende olımpıadalardyń jeńimpazy bolǵan jáne bizben jarystarǵa qatysqandaǵy tájirıbesimen bólisedi. Abylaı Maranulynyń áńgimeleri bizge jańa belesterdi baǵyndyrýǵa kúsh-jiger beredi. Ustazyma aıtar alǵysym sheksiz. Abylaı Maranuly men ata-anamnyń qoldaýy men eńbeginiń arqasynda hımıa páninen halyqaralyq olımpıadada eki ret jeńimpaz atandym. Byltyr kúmis júldeger atansam, bıyl altyn medal jeńip aldym» , - dedi IChO jeńimpazy Madıar Qasymáli ustazy týraly.
Sońǵy bes jylda ustaz Abylaı Samatovtyń shákirtteri hımıadan IChO halyqaralyq olımpıadasynyń, Halyqaralyq Mendeleev olımpıadasynyń jeńimpazy atanrǵan.
Sondaı-aq ol jańartylǵan oqý baǵdarlamasyna arnalǵan hımıa oqýlyǵynyń birlesken avtory.
Pedagog óz eńbegi úshin bilim basqarmasynyń, Bilim jáne ǵylym mınıstrliginiń Qurmet gramotasymen marapattalǵan.
Sondaı-aq «Halyqaralyq olımpıada jeńimpazdaryn tárbıelegen úzdik pedagog» nomınasıasy boıynsha Qaraǵandy oblysy ákimi syılyǵynyń, «Úzdik pedagog-2018» tósbelgisiniń ıegeri.
«Maǵan balalarmen jumys istegen unaıdy. Olardy yntalandyrý, talantyn ashý jáne olarǵa sený mańyzdy. Bizde daryndy balalar óte kóp. Eń bastysy - ár oqýshymen til tabysa bilý kerek, sonda nátıje de bolady. Olarǵa senim men qoldaý kórsetý jańa belesterdi baǵyndyryp, bıik jeńisterge jetýge kómektesedi» , – deıdi hımıa pániniń muǵalimi Abylaı Samatov.