Qazaqstanda munaı-gaz hımıasyn júıeli damytý maqsatynda aýmaǵy 3,5 myń gektardan asatyn arnaıy ekonomıkalyq aımaq (AEA) quryldy. Jańa AEA úsh negizgi óndiristik alańdy qamtıdy: Qarabatan, Teńiz jáne Tehnopark. Bul týraly Aqshamnews.kz saıty habarlaıdy.
AEA-nyń qurylýy elimizdiń munaı-gaz sektorynyń joǵary tehnologıalyq qaıta óńdeý deńgeıine kóshýine jáne ınvestısıalyq tartymdylyǵyn arttyrýǵa baǵyttalǵan mańyzdy qadam bolyp otyr.
Qarabatan alańynda qazirgi tańda iri ınfraqurylymdyq jobalar iske asyrylyp jatyr. Bul jerde tirkelgen 18 kásiporyn polıpropılen, polıetılen, sıntetıkalyq kaýchýk jáne plasıkalyq buıymdar óndirýmen aınalysady. Qarabatan — munaı-gaz hımıasynyń iri óndiristik ortalyǵyna aınalý jolynda.
AEA quramyndaǵy Tehnopark alańy shaǵyn jáne orta bıznes sýbektilerine arnalǵan. Munda munaı-hımıalyq shıkizat negizinde polıetılentereftalat pen tereftal qyshqyly syndy joǵary sapaly ónimder óndiriledi. Bul baǵyt eldegi hımıa ónerkásibiniń ártaraptandyrylýyna jol ashady.
Teńiz alańynda gazdy bólýge arnalǵan keshen ornalasqan. Bul keshen jylyna 1,6 mıllıon tonna etan óndirý múmkindigine ıe iri polıetılen jobasyn shıkizatpen qamtamasyz etedi. Bul óndiris bolashaqta elimizdi álemdik polıetılen naryǵynda mańyzdy oıynshyǵa aınaldyrýy múmkin.
Jańa arnaıy ekonomıkalyq aımaqtyń qurylýy — Qazaqstannyń munaı-gaz hımıasy salasynda joǵary tehnologıalarǵa negizdelgen óndiristerdi damytýdy kózdeıtin strategıalyq bastamasy. Qarabatan, Teńiz jáne Tehnopark sekildi alańdardyń árqaısysy ózindik baǵytymen el ekonomıkasyna zor úles qosyp otyr.