Qazaqstan strategıalyq zertteýler ınstıtýtynyń (KISI) tapsyrysymen júrgizilgen saýalnama nátıjesi el turǵyndarynyń basym kópshiligi memlekettiń damý baǵytyna oń kózqaras bildiretinin kórsetti. Bul týraly Aqshamnews.kz saıty habarlaıdy.
KISI resmı saıtynda 2025 jylǵy 5 mamyrda jarıalanǵan málimetke sáıkes, respondentterdiń 73,3%-y Qazaqstannyń durys baǵytta damyp jatqanyn atap ótken. Ásirese, jastar arasynda bul kórsetkish joǵary — 18-29 jas aralyǵyndaǵy azamattardyń 82%-y el damý baǵytyna senim bildiredi.
Zertteý málimetterine súıensek, áıelder erlerge qaraǵanda eldiń damý qarqynyna anaǵurlym senimdi: áıelderdiń 75,3%-y, al erlerdiń 71,1%-y el bolashaǵyna oń baǵa bergen. Bul kórsetkish áıelder men jastardyń áleýmettik optımızminiń joǵary ekenin kórsetedi.
Saýalnama barysynda respondentterdiń 76,4%-y Memleket basshysyna senim bildiretinin jetkizgen. Bul senim deńgeıi ásirese jastar arasynda joǵary — 84,6%, áıelder arasynda — 78,1%, al erler arasynda — 74,5%. Qalalyq jáne aýyldyq turǵyndardyń arasynda da aıyrmashylyq az: tıisinshe 76,1% jáne 76,8%.
Aldaǵy bes jylda eldiń damý perspektıvalaryn 60,8% respondent "óte jaqsy" nemese "kóbine jaqsy" dep baǵalaǵan. Bul kórsetkish qoǵamda turaqty áleýmettik optımızmniń bar ekenin bildiredi. Sonymen qatar, respondentterdiń 57,3%-y óz ómirine tolyq qanaǵattanatynyn, 32,8%-y – kóbine qanaǵattanatynyn málimdegen.
Saýalnama barysynda qazaqstandyqtardyń saıası, ekonomıkalyq jáne qoǵamdyq aqparatty kóbine áleýmettik jeliler (34,7%) men ınternet-basylymdardan (30,3%) alatyny belgili boldy. Bul aqparattyq keńistikte sıfrlyq medıanyń róliniń artyp kele jatqanyn kórsetedi.
8 myńnan astam azamattyń qatysýymen júrgizilgen bul keń aýqymdy zertteý — el turǵyndarynyń áleýmettik kóńil-kúıi, bolashaqqa senimi men Memleket basshysyna degen senim deńgeıi joǵary ekenin kórsetti. Qazaqstan qoǵamynda oń ózgeristerge degen úmit pen qoldaý basym.