Almatynyń birneshe aýdanynda aǵash otyrǵyzyldy
19 naýryz – Jańarý kúni. Jańa formatta toılana bastaǵan merekeniń altynshy kúnin almatylyqtar aǵash otyrǵyzý jumystarymen jalǵastyrdy. Bul kúni Almatynyń birneshe aýdandarynda aǵash egildi, dep habarlaıdy almaty-akshamy.kz.
Jańarý kúnine oraı uıymdastyrylǵan is-sharanyń biri – Naýryzbaı aýdanyndaǵy «Shuǵyla» yqshamaýdanyndaǵy №200 mektep-gımnazıada ótti. Mektep dırektory Aınur Nurymqyzy ózi oqýshylarmen birge júrip, mektep aýlasyna 50 túp shyrsha, 50 túp tuıa aǵashtary otyrǵyzdy.
– Týǵan jerge, Otanǵa degen súıispenshilikterin arttyrýǵa, ekologıalyq bilimdi qalyptastyrý men tabıǵatty qorǵaýǵa baýlýdy maqsat etetin sharanyń jas urpaqqa bereri mol. Bul sharaǵa mektep ujymy bir kisideı atsalysyp, saýaby mol iste belsendilik tanytty, – deıdi dırektordyń tárbıe isi jónindegi orynbasary Aqmaral Salqynbekova.
Shara barysynda «Qara jorǵa» bıinen fleshmob, birneshe sport túrlerinen jarys ótti. Igilikti iske atsalysqandar uıymdastyrýshylar ázirlegen baýyrsaq pen naýryz kójeden dám tatyp, úılerine arqa-jarqa kóńil-kúımen tarqasty.
