Chempıondar lıgasynda óner kórsetip jatqan almatylyq «Qaırat» fýtbol klýby Slovenıanyń «Olımpıa» komandasyn eki oıynnyń qorytyndysy boıynsha 3:1 (1:1, 2:0) esebimen jeńip, kelesi kezeńge joldama aldy.
Jankúıerdi jelpintken jeńis
Bul – almatylyq komanda tarıhyndaǵy ekinshi eleýli jetistik. Eske salsaq, budan tórt jyl buryn Qazaqstannyń eń iri megapolısiniń ókilderi Izraıldiń «Makabı» klýbyn óz alańynda 2:0 esebimen jeńip, syrt alańda 1:1 nátıjesin tirkep, alǵashqy irikteý kezeńinen súrinbeı ótken bolatyn. Alaıda, kelesi aınalymda serbtiń áıgili «Srvena Zvezda» komandasyna qarsylas atanǵan «Qaırat» óz alańynda 2:1 esebimen jeńiske jetkenimen, Belgradtaǵy qarymta kezdesýde 0:5 esebimen oısyraı utyldy.
Alaıda, ýaqyt óz degenin jasaıdy. Ýaqyt óte kele quram jańaryp, jasyl alańda jańa esimder paıda bolady. Bul – ómir zańdylyǵy. Bıylǵy jerebe Slovenıanyń kóp dúrkin chempıony «Olımpıany» qarsylas retinde belgilegende, kópshiliktiń kókeıinde kúmán bolǵany ras. Sebebi, «Olımpıa» – óz eliniń 8 dúrkin chempıony, sońǵy eki jyl qatarynan eshbir qarsylasqa ese jibermeı, chempıondyqty ıelenip keledi. Ótken maýsymda el chempıonatynda ekinshi oryn alǵan «Marıbor» klýbyn 7 upaıǵa basyp ozǵan.
Alǵashqy oıyn Slovenıada ótti. Bul machta alań ıeleri basymdyq tanytyp, dopty kóbirek ıelendi. Al «Qaırat» qarymta shabýyldarǵa súıenip, qorǵanysty bekem ustaýǵa tyrysty. Bas bapker Rafael Ýrazbahtın usynǵan taktıka kútpegen nátıje berdi. Kezdesýdiń alǵashqy golyn «Qaırat» soqty. Jorjıno men Sátbaevtyń ózara túsinisýimen órbigen shabýyldy 16 jastaǵy Sátbaev sátti aıaqtap, komandasyn alǵa shyǵardy. Aıta keterligi, bul – qazaq fýtbolshysy úshin eýrokýboktardaǵy alǵashqy jáne tarıhı gol boldy. Alaıda mach sońyna qaraı «Olımpıa» shabýylyn kúsheıtip, esepti teńestirip úlgerdi – 1:1.
Barlyǵy Almatydaǵy qarymta kezdesýde sheshildi. Kópshilik sloven klýbyn favorıt sanaǵanymen, oıyn taǵdyryn «Qaırat» sheshti. Oıynnyń alǵashqy mınýttarynda-aq «Olımpıa» basymdyqqa umtyldy. Alańnyń kóp bóligin «Qaırat» qorǵanysqa jumsaýǵa májbúr boldy. Degenmen, besinshi mınýtta kútpegen shabýyl uıymdastyrylyp, sol qaptaldan kóterilgen dopty portýgalıalyq Jorjıno baspen torǵa toǵytty. Qaqpashy Gala Lúbeı-Fınk dopty toqtata almady – esep 1:0.
Sloven saıypqyrandary súrindi
Kezdesý barysynda dop ıelený jaǵynan qonaqtar basym bolǵanymen, alań ıeleri qorǵanysta saýatty oınady. Qaqpashy Aleksandr Zarýskıı sheberlik tanytyp, qaýiptiń betin qaıtara bildi. Qarymta shabýyldar da ótkir órbidi. Dastan Sátbaev eki ret jeke shabýylǵa shyǵyp, qaýipti sát týdyrdy. Biraq qarsylas qorǵaýshylar baryn salyp tosqaýyl qoıdy. Birinshi taım sońyna taman taǵy bir qatelikke boı aldyrǵan qonaqtar bul joly Jorjınonyń pasynan keıin týǵan kúniń atap ótken Aleksandr Mrynskııdiń dál soqqysyna tótep bere almady. Esep – 2:0. Aıta ketý kerek, Mrynskıı – «Qaırat» klýbynyń óz tárbıelenýshisi.
Oıynnyń ekinshi bóliginde de slovender shabýyldy údete tústi. Bir sátte Aleks Tamm qaqpaǵa soqqy jasaý múmkindigin paıdalanǵanymen, nátıje shyqpady. Jankúıerler sol sátte demin ishine tartyp, alańdaǵylarmen birge alańdady. 90 mınýt boıy «Qaırat» qaqpasyna týra soqqy jasalmady deýge bolady. Qosymsha ýaqytta alań ıeleri taǵy bir gol soqqanymen, tóreshi ony oıynnan tys dep tanyp, esepke almady.
Osylaısha eki machtyń qorytyndysy boıynsha «Qaırat» laıyqty jeńiske jetip, Chempıondar lıgasynyń ekinshi irikteý kezeńine ótti. Bul joly olar Fınlándıa chempıony – KýPS klýbymen kezdesetin bolady. Machtar 22 jáne 29 shildede ótedi.
Fýtbol mamandary Rafael Ýrazbahtın baptaıtyn komanda mundaı uıymshyldyqpen ári taktıkalyq dáldikpen oınasa, odan ári ótýge de tolyq múmkindigi bar dep baǵalap otyr. Sondyqtan da el namysyn qorǵaıtyn «Qaırat» klýby kelesi qarsylasyna da dál osyndaı minez kórsetse, alar asýy alda dep senimmen aıtýǵa bolady.
Álim ANAPÁNOV