2025 jylǵy 26 tamyzda Almatyda barsha qazaqstandyq kútken tarıhı mach ótedi. ÝEFA Chempıondar lıgasynyń pleı-off kezeńinde "Qaırat" pen "Seltık" qaıta kezdesedi. Alǵashqy oıynda qos komanda teń tarqasyp, bul qarymta kezdesýge degen qyzyǵýshylyqty burynǵydan da arttyrdy. "Qaırat" úshin mundaı deńgeıdegi oıyn buryn-sońdy bolmaǵandyqtan, jankúıerler de erekshe úmitpen kútip otyr. Osy oraıda Aqshamnews.kz tilshisi sarapshy Aınat Qabıdýlladan aldaǵy oıynǵa qatysty pikirin surap, "Qaırattyń" múmkindikteri jaıly aqpar aldy.
"Tosyn nátıje, kútpegen sensasıa"
Sarapshynyń aıtýynsha, kópshilik "Qaırattan" mundaı jetistik kútpegen.
"Bul - "Qaırat" úshin tarıhı mańyzdy oıyn. Klýb tarıhynda dál osyndaı deńgeıdegi sheshýshi machter buryn bolmaǵan. Kópshilik jankúıer "Qaıratty" ary ketse Konferensıa lıgasynda oınaıdy dep boljaǵan edi. Alaıda Ýrazbahtınniń shákirtteri "Slovandy" jeńip, kútpegen sensasıa jasady. Endi "Seltıkke" qarsy eki oıynda da favorıt shotlandtyqtar ekeni anyq. Biraq "sary-qaralar" Glazgoda esh qoryqpaı oınap, shabýylǵa shyǵyp, naǵyz minez kórsetti. Tipti ofsaıdtan bolsa da gol soǵyp úlgerdik", - dedi Aınat Qabıdýlla.
"Almatyda "Seltıkke" ońaı bolmaıdy"
Sarapshy machtiń Almatydaǵy ahýaly qonaqtarǵa yńǵaısyz bolatynyn erekshe atady.
"Almatydaǵy mach qonaqtar úshin ońaı bolmaıdy. "Seltık" buǵan deıin qazaqstandyq klýbtarǵa qarsy syrt alańda jeńiske jetip kórmegen. Al "Qaırat" bıylǵy eýrokýbok maýsymynda óz alańynda áli jeńilgen joq. Bul - kúlli Eýropany tańǵaldyryp otyrǵan jetistik. Onyń ústine, Almatyǵa kelgen árbir oıynshyǵa jergilikti taýly aımaqtyń aýa raıyna beıimdelý ońaı emes, munda qysym ózgeshe, stadıondaǵy alań sapasy da Eýropadaǵydaı minsiz emes. Sondyqtan "Seltıktiń" bizdiń alańda qınalyp qalýy ábden múmkin", - deıdi ol.
"Negizgi qıyndyq – basty oıynshylardyń joǵy"
Degenmen sarapshy "Qaırattyń" óz qıyndyqtary da baryn jasyrmady.
"Qaırat" úshin basty qıyndyqtardyń biri - Dastan Sátpaevtyń bolmaýy. Shabýyl shebinde onyń ornyn basatyn oıynshylar bar bolǵanymen, komandany Dastansyz elestetý qıyn. Taǵy bir úlken shyǵyn - Aleksandr Zarýskııdiń jaraqaty. Ol tek osy oıynda ǵana emes, maýsymnyń sońyna deıin komandaǵa kómektese almaıdy. Onyń ornyn basatyn Temirlan Anarbekov premer-lıgada senimdi oınap júr, biraq onyń deńgeıi Chempıondar lıgasynyń qarqynyna sáıkes kele me? belgisiz. Degenmen bar úmitimiz Temirlanda."
"Barlyǵy alǵashqy mınýttarda sheshilýi múmkin"
Sarapshy "Qaırattyń" oıyny mach basynda sheshilýi yqtımal dep sanaıdy.
""Qaırattyń" chempıondar lıgasynyń toptyq kezeńinde oınaýǵa tolyqqandy múmkinshiligi bar. Menińshe "Qaırat" barlyq sharýany alǵashqy 15 mınýtta sheshýge tyrysady. Alǵashqy mınýttarda gol soǵyp, qarsylas komandany qorǵanystan ótkizbeı, penaltı serıasyna jetkizbeı, jeńýi qajet. Edmılson gol avtory atanýy múmkin jáne buryshtamadan boıynyń uzyndyǵyn paıdalanyp Egor Sorokın de soǵyp ketýi múmkin degen boljamym bar."
"Qaırat" úshin bul mach - tek pleı-off emes, tutas qazaqstandyq fýtboldyń tarıhyn qaıta jazatyn múmkindik. Shotlandıalyq alpaýytpen teń dárejede kúresý - úlken jetistik, al toptyq kezeńge ótý - jańa dáýirdiń bastaýy bolmaq.
Ótken oıynda ne este qaldy?
18 jastaǵy Sherhan Qalmurza "juldyz" atandy.
"Seltık Parktegi" tartysty sátte negizgi qaqpashy Zarýskıı jaraqat aldy, al onyń ornyna túsken Anarbekov te aýyr soqqy aldy. Sol kezde telekameralar skameıkadaǵy jas qaqpashy Sherhan Qalmurzany kórsetip, ol áleýmettik jelilerde birden talqylandy. Kópshilik ony "áli alańǵa shyqpaı jatyp halyq juldyzyna aınaldy" dep baǵalady.
Kórermen rekordy tirkeldi.
Machti stadıonda 56 myń jankúıer tamashalady. Bul - Chempıondar lıgasynyń pleı-off kezeńindegi eń joǵary kórsetkish ári qazaqstandyq klýbtar qatysqan oıyndar tarıhyndaǵy rekord. Buǵan deıingi eń úlken aýdıtorıa da dál osy "Seltık Parkte" tirkelgen bolatyn.
Dastan Sátpaevtyń sary qaǵazy.
Oıynnyń eń sońǵy mınýtynda jas shabýylshy Dastan Sátpaev qarsylastyń pasyn bógep, sary qaǵaz aldy. Bul onyń úshinshi eskertýi bolyp, ereje boıynsha kelesi machke qatysa almaıtyn boldy. Osy sát jankúıerlerdiń esinde erekshe qaldy, óıtkeni "Qaırat" aldaǵy sheshýshi oıynda negizgi oıynshysyz qalady.
Aıta keteıik, 26 tamyzda Almatydaǵy Ortalyq stadıonda "Qaırat" pen shotlandıalyq "Seltık" taǵy da kezdesedi. Bıletter 19 jáne 25 tamyzda ashylǵanymen, lezde satylyp ketti.