Mınıstr Balaeva jýrnalıs Aqjolovaǵa Prezıdenttiń hatyn jetkizdi.
Almaty oblysynyń týmasy, Qazaqstanǵa eńbegi sińgen mádenıet qaıratkeri, ardager jýrnalıs Hanymbúbi Aqjolova 100 jasqa toldy, dep habarlaıdy Almaty-akshamy.kz.
23 shildede Almaty qalasyndaǵy «Dostyq úıinde» Aqparat jáne qoǵamdyq damý mınıstri Aıda Balaeva Qazaqstannyń eńbek sińirgen mádenıet qaıratkeri, ardager jýrnalıs Hanymbúbi Aqjolovanyń 100 jasqa tolýyna baılanysty mereıtoı ıesine Memleket basshysy Qasym-Jomart Toqaevtyń arnaıy Alǵys hatyn tabystady.
«Siz ǵıbratty ǵumyr jolyńyzdyń búgingi bir ǵasyrlyq belesine úlkenge de, jasqa da úlgi bolatyn adamı bıik bolmysyńyzben jetip otyrsyz. Otandyq baspasóz salasynda kóp jyl qajyrly qyzmet etip, elimizdiń buqaralyq aqparat quraldaryn damytýǵa orasan zor eńbek sińirdińiz. El ıgiligi úshin atqarǵan jemisti jumysyńyz úshin Sizge alǵysymdy bildirip, 100 jasqa tolǵan mereıtoıyńyzben shyn júrekten quttyqtaımyn. Denińizge saýlyq, áýletińizge amandyq tileımin», – delingen Alǵys hatta.
Ardager jýrnalıs 1949 jyly bilim ordasyn qyzyl dıplommen támamdap, «Sosıalısik Qazaqstan» («Egemen Qazaqstan») respýblıkalyq gazetinde uzaq jyldar boıy qyzmet atqarǵan. Keıinnen týǵan jerine oralyp, Jambyl aýdandyq «Bólshevıktik jol» («Ekpindi eńbek») gazetine redaktor bolyp taǵaıyndalyp, qajyrly eńbek etedi. 1971 jyly zeınet jasyna jetip, «Qazaqstanǵa eńbegi sińgen mádenıet qaıratkeri» qurmetti ataǵyn ıelengen. Almaty oblysynyń qurmetti azamaty.
«Siz búkil sanaly ǵumyryńyzdy qazaq jýrnalısıkasynyń damýyna arnadyńyz. Sondyqtan ózińizdiń tól salańyz – baspasóz zamanmen birge ósip-órkendep, óz ornyn joǵaltpaı keledi. Munyń ózi eń aldymen ózińizdeı ardager-jýrnalıster salǵan sara joldyń jemisti jalǵasy ekeni daýsyz. Sondyqtan búgingi mereıtoıyńyz - áýletińizdiń ǵana emes, bizdiń Ulttyq jýrnalısıkanyń ortaq qýanyshy», - dedi mınıstr Aıda Balaeva quttyqtaý barysynda.
