Prezıdent SHYU-ǵa múshe memleketter basshylary keńesiniń otyrysyna qatysty.
Onda Memleket basshysy energetıkalyq yntymaqtastyqty nyǵaıtý baǵytyndaǵy ózara júıeli is-áreketterdi jolǵa qoıýdyń ózektiligi artyp kele jatqanyn aıtty, dep habarlaıdy Almaty-akshamy.kz.
«Bizge energetıkalyq tepe-teńdikti qamtamasyz etý jumystaryn úılestirý qajet. Sondaı-aq energetıkanyń jańa túrlerine kóshýge, ekonomıka men ónerkásipti kómirteginen aryltýǵa baǵyttalǵan kelisimdi is-áreketter kerek. Osyǵan baılanysty kelesi Astana samıtine deıin SHYU-nyń Energetıkalyq strategıasyn kelisýdi usynamyn. Bul qujattyń qabyldanýy ornyqty damý salasyndaǵy BUU Kún tártibiniń maqsattaryn júzege asyrýǵa yqpal etedi», – dedi Memleket basshysy.
Prezıdent atalǵan máseleniń asa mańyzdy ekenin eskere otyryp, Qazaqstanda SHYU-nyń Energetıkalyq forýmyn ótkizýge daıyn ekenimizdi jetkizdi. Bul saladaǵy yntymaqtastyqtyń perspektıvalaryn jan-jaqty talqylaý elderimizdiń energetıkalyq qaýipsizdigi men teńgerimdi damýyn qamtamasyz etý úshin birlesken ádister ázirleýge múmkindik beredi.
Prezıdent ártúrli elder men áleýmettik toptar arasyndaǵy «sıfrlyq alshaqtyq» ózekti problemaǵa aınalyp otyrǵanyn atap ótti. «Sondyqtan sıfrlyq teńsizdikti josparly túrde azaıtý bizdiń uıym qyzmetinde naqty basymdyqqa aınalýǵa tıis» dedi.
«Úndistan SHYU-ǵa tóraǵalyq etken kezeńde bul baǵyttaǵy yntymaqtastyqty damytý úshin aýqymdy jumys atqardy. Endi osy strategıalyq mańyzdy saladaǵy úzdik tájirıbelerdi almasý isin odan ári jalǵastyryp, jolǵa qoıylǵan baılanystardy saqtaý jáne nyǵaıtý mańyzdy. Byltyr Qazaqstan BUU-nyń elektrondy úkimetti damytý ındeksi boıynsha 28-oryndy ıelendi. Bul – SHYU-ǵa múshe memleketter arasyndaǵy eń joǵary kórsetkish», – dedi Prezıdent.