Prezıdent SHYU-ǵa múshe memleketter basshylary keńesiniń otyrysy barysynda sóz sóılep, elder arasynda energetıkalyq yntymaqtastyqty nyǵaıtý mańyzy jaıly sóz qozǵady, dep habarlaıdy Almaty-akshamy.kz.
«Búginde bul baǵyttaǵy ózara júıeli is-áreketterdi jolǵa qoıýdyń ózektiligi artyp keledi. Bizge energetıkalyq tepe-teńdikti qamtamasyz etý jumystaryn úılestirý qajet. Sondaı-aq energetıkanyń jańa túrlerine kóshýge, ekonomıka men ónerkásipti kómirteginen aryltýǵa baǵyttalǵan kelisimdi is-áreketter kerek. Osyǵan baılanysty kelesi Astana samıtine deıin SHYU-nyń Energetıkalyq strategıasyn kelisýdi usynamyn. Bul qujattyń qabyldanýy ornyqty damý salasyndaǵy BUU Kún tártibiniń maqsattaryn júzege asyrýǵa yqpal etedi», dedi Memleket basshysy.
Sonymen qatar Prezıdent atalǵan máseleniń asa mańyzdy ekenin eskere otyryp, Qazaqstanda SHYU-nyń energetıkalyq forýmyn ótkizýge daıyn ekenin aıtyp ótti. Qasym-Jomart Toqaevtyń aıtýynsha, bul saladaǵy yntymaqtastyqtyń perspektıvalaryn jan-jaqty talqylaý SHYU elderiniń energetıkalyq qaýipsizdigi men teńgerimin qamtamasyz etý úshin birlesken ádister ázirleýge múmkindik beredi.«Ózge halyqaralyq uıymdardyń tájirıbesine súıene otyryp, SHYU janynan Turaqty ókilder keńesin qurý jáne olarǵa memleketterimizdiń múddesin qorǵaý quzyretin berý mańyzdy dep sanaımyn. Ózara jaýapkershilik pen tileýlestik negizinde ınklúzıvti damý men jasampaz progres jolynda alǵa qaraı batyl qadam basýymyz kerek. Tóraǵalyq etý kezegin qabyl ala otyryp, SHYU keńistigindegi qaýipsizdik, beıbitshilik jáne órkendeý isin odan ári nyǵaıta túsý úshin uıymdaǵy mártebesine qaramastan barlyq elmen aradaǵy belsendi jáne tabysty jumysty jalǵastyramyz. Osy oraıda barshańyzdy Shanhaı yntymaqtastyq uıymynyń Qazaqstan elordasy – Astanada ótetin kelesi samıtine qatysýǵa shaqyramyn», dep túıindedi Memleket basshysy.