Memleket basshysy Qasym-Jomart Toqaev Úkimettiń keńeıtilgen keńesinde ınvestısıalyq jobalardyń sıfrlyq derekter bazasyn qurýdy tapsyrdy, dep habarlaıdy Almaty-akshamy.kz QazAqparatqa silteme jasap.
«Jalpy, Úkimet pen ákimder ınvestısıa tartý baǵytyndaǵy jumysty edáýir jandandyrýy kerek. Men bul týraly aıttym, biraq erekshe mańyzdylyǵyn eskere otyryp, qaıtalaımyn. Iá, byltyr tartylǵan tikeleı sheteldik ınvestısıanyń kólemi sońǵy 10 jyldaǵy rekordtyq mólsherge jetti – 28 mıllıard dollar tartyldy.
Prezıdent tartylǵan ınvestısıalardyń 43%-dan astamy ádettegideı taý-ken sektoryna jumsalyp otyrǵanyn atap ótti.
«Al óńdeý ónerkásibine salynǵan ınvestısıalar jalpy ınvestısıanyń besten bir bóligin ǵana qurady. Sondyqtan bizge ıkemdi, bizdiń qajettilikterimiz ben shynaıy jaǵdaıymyzǵa beıimdelgen salyq saıasaty jáne memlekettik qyzmetshilerdiń utqyrlyǵy men qarjylaı tazalyǵy kerek. Investısıalardy tartýdyń tıimdi júıesin qurý qajet. Eń bastysy ınvestısıalar sińimdi bolýy qajet. Sheteldik ınvestorlarǵa naqty jobalarǵa ınvestısıa salýdy, daıyn pakettik sheshimderdi usyný kerek. Úkimet naqty salalardaǵy iri sheteldik seriktestermen nátıjeli jumys istep otyr. Biraq bul baǵyttaǵy jumsalyp jatqan kúsh-jigerdi arttyrý qajet. Interaktıvti ınvestısıalyq karta quryp, ár óńirdiń ınvestısıalyq jobalary men ınvestorlary týraly derekterdiń sıfrlyq bazasyn iske qosý qajet», – dedi Memleket basshysy.