Qazirgi epıdemıologıalyq jaǵdaı týraly aıtyldy.
Qazaqstan Prezıdenti Qasym-Jomart Toqaev Densaýlyq saqtaý mınıstri Alekseı Soıdyń esebin tyńdady, dep habarlaıdy Almaty-akshamy.
Prezıdentke qazirgi epıdemıologıalyq jaǵdaı, ekpe egý jumystarynyń barysy jáne elimizge vaksına jetkizý jónindegi ýaǵdalastyqtar týraly baıandaldy.
«Qasym-Jomart Toqaevqa birqatar óńirde karantın sharalarynyń kúsheıtilgeni, juqpaly aýrýlar stasıonarlary men jan saqtaý bólimderinde em qabyldap jatqan naýqastar sany, dári-dármekter men basqa da qajetti jabdyqtar qory, vaksına salý qarqyny baıaý óńirlerge kórsetilip jatqan ádistemelik kómek jaıynda málimet berildi», – dep jazdy Prezıdentiniń baspasóz hatshysy Berik Ýálıdiń Facebook -tegi paraqshasynda.
Alekseı Soıdyń aıtýynsha, maýsym aıyndaǵy jaǵdaımen salystyrǵanda shildeniń sońǵy eki aptasynda indet juqtyrǵandardyń sany 4,8 esege kóbeıgen. Kúndelikti júrgizilgen monıtorıń boıynsha. 24 shildedegi málimetke sáıkes, juqpaly aýrýlar bólimderiniń 51 paıyzynda, jan saqtaý bólimderiniń 41 paıyzynda naýqastar em qabyldap jatyr. Vırýs juqtyrǵandar sanynyń kóbeıýine jáne densaýlyq saqtaý júıesine túsken salmaqtyń artýyna baılanysty shilde aıynda qosymsha 10 myń tósek-oryn ázirlendi. Qazirgi ýaqytta 21,4 myńǵa jýyq oryn rezervte tur.
Sonymen qatar Densaýlyq saqtaý mınıstri Prezıdentke álemde koronavırýs indetiniń jańa «Lámbda» shtamynyń paıda bolýy men taralýy týraly aıtty. Bul vırýs alǵash ret 2020 jylǵy jeltoqsanda Perýde tirkelgen. Búginde indettiń osy túrin 30 memlekette, negizinen Soltústik jáne Ońtústik Amerıka men Eýropa elderinde 3 myńǵa jýyq adam juqtyrǵan.
«Qasym-Jomart Toqaev Alekseı Soıǵa elimizdegi epıdemıologıalyq ahýaldy qatań baqylaýda ustaýdy, jappaı ekpe salý qarqynyn arttyrýdy, naýqastarǵa ýaqytyly medısınalyq kómek kórsetý jumystaryn, sonyń ishinde alǵashqy medısınalyq-sanıtarlyq járdemdi sapaly uıymdastyrýdy tapsyrdy», – dep habarlady Berik Ýálı.