Kúdikti úsh birdeı Iphone 12 uıaly telefonyn jymqyrǵan.
Almaty oblysynyń azamaty qymbat telefon urlady degen kúdikpen polıseılerdiń qolyna tústi, dep habarlaıdy Almaty-akshamy.kz.
İshki ister mınıstrliginiń resmı saıtyndaǵy málimet boıynsha, Kentaý QPB-ǵa jergilikti turǵyn aryzdanǵan. Ol aryzynda óziniń saýda úıine belgisiz bireýler túngi ýaqytta kirip, úsh birdeı Iphone 12 uıaly telefonyn jymqyryp ketkenin kórsetken. Osy oqıǵaǵa baılanysty tártip saqshylary habar alysymen jolǵa shyqqan.
«Polıseıler oqıǵanyń mán-jaıyn anyqtap, kúdikti retinde tanylǵan Almaty oblysynyń turǵynyn ustady. Sondaı-aq tártip saqshylary orta jastaǵy kúdikti azamatty PB-ǵa jetkizip, oryn alǵan jaıttyń aq-qarasyn ajyratý maqsatynda tergeý amaldaryn júrgizdi», – dep habarlady mamandar.
Mamandardyń aıtýynsha, kúdikti azamat jábirlenýshiniń qol astyndaǵy jumyskeri bolǵan. Jábirlenýshi azamat uıaly telefondardy óz jumysshysyna senip tapsyrǵan. Alaıda kúdikti senip tapsyrylǵan telefondardy óz paıdasy úshin jymqyryp, izin sýytqan. Sondaı-aq kúdikti qoldy etken uıaly telefondy arzan baǵada satyp úlgergen.
«Polıseıler bul jaıtty QR Qylmystyq kodeksiniń 189-baby (Senip tapsyrylǵan bóten múlikti ıemdenip alý nemese talan-tarajǵa salý) boıynsha tirkedi. Jábirlenýshige keltirilgen jalpy shyǵyn kólemi 1 500 000 teńge. Qazirgi tańda polısıa qyzmetkerleri kúdikti azamatqa qatysty sotqa deıingi tergeý amaldaryn jalǵastyrýda. Óz kezeginde polıseıler turǵyndarǵa beıtanys azamattarǵa artyq senim bildirmeýge shaqyrady», – delingen habarlamada.