Ertis óńirinde Uly Otan soǵysy jyldary el men jer úshin otqa túsken 18 ardager bar
Jeńis kúni qarsańynda olarǵa syı-qurmet kórsetilip jatyr, dep habarlaıdy Almaty-akshamy.kz Baq.kz-ke silteme jasap.
Osy kúnderi oblys basshylyǵy oblystyń túkpir-túkpirinde turatyn ardagerlerdiń shańyraqtarynda bolyp, merekemen quttyqtady.
Oblys ákimi Ábilqaıyr Sqaqovtyń aıtýynsha, maıdangerler – oblysymyzdyń altyn qoryndaǵy arda azamattar. Aımaq basshysy aldymen Ertis aýdanynyń Severnoe aýylynda turatyn Alekseı Pechetalovtyń januıasyna at basyn tiredi. Ardager júk kóligin júrgizip, baý-baqsha sharýashylyǵyna jetekshilik etken.
Al Shiderti aýylynda turatyn Marıa Smırnova ómir boıy optımısigimen erekshelenip keledi. Soǵys taýqymetin tartqanyna qaramastan, jan dúnıesi sergek.
«1927 jyly ata-anam kollektıvtendirý sharalaryna qatysty. Olardy alyp ta ketti. Sondyqtan, jas kezimnen bastap kolhozdyń jumysyna aralastym. Eresek adamdardan qalyspadym. Sebebi, halyqtyń ishinde boldym, ajyraǵan joqpyn», - deıdi ardager.
Marıa Smırnova 1942 jyly 312-shi atqyshtar dıvızıasynyń quramynda sanıtarlyq nusqaýshy boldy. Rjev doǵasynda alǵan jaraqatynan soń qyzmetin qaıta atqardy. Al 1964 jyly Pavlodar oblysyna kelip, Maıqaıyń kenishinde eńbek etti. «Ertis-Qaraǵandy» arnasynyń qurylysyna da atsalysty. Búginde eki ul men bir qyzdy tárbıelegen baqytty ana.
Aıta keteıik, mereke qarsańynda Jeńis kúnin jaqyndatqan batyr ardagerler eki mıllıon teńge kóleminde bir rettik kómek alady. Dese de, Jeńis syılaǵan azamattarǵa qansha qurmet kórsetsek te, az bolar.