Pavlodarda 9 jastaǵy bala 3-qabattaǵy balkonnan qulap ketti, - dep habarlaıdy aqshamnews.kz tilshisi.
Bul oqıǵa jaıly óńirlik bala quqyqtary jónindegi ýákil Sáýle Shákenova aıtty. Oqıǵa 19 shilde kúni keshke bolǵan.
Qazir bala jansaqtaý bóliminde jatyr.
"2016 jyly týǵan, erekshe bilim berýdi qajet etetin bala úshinshi qabatta ornalasqan ortaq kireberis balkonynan qulaǵan", – dedi Shákenova.
Kýágerlerdiń aıtýynsha, bala ekinshi qabattyń tóbesindegi jappaǵa qulaǵan. Ony jedel járdem dereý aýrýhanaǵa jetkizgen.
Oblystyq balalar aýrýhanasynyń málimetinshe, balada aýyr jaraqattar anyqtalǵan:
"Balada katatravma, ekinshi dárejeli travmatıkalyq shok, jabyq bas-súıek mı jaraqatyn alǵan, mıy shaıqalǵan, kókirek qýysynyń jaraqaty bar, qol súıegi synǵan, ishki aǵzalary zaqymdany tirkeldi", – dep habarlady dárigerler.
Dárigerlerdiń aıtýynsha, balanyń jaǵdaıy aýyr.
Bul aýrýhanaǵa bir kún buryn Aqsý qalasynan 2 jastaǵy sábı de jetkizilgen.
"Balanyń anasynyń aıtýynsha, 18 shildede keshki saǵat 20:00 shamasynda uly jeke úıdiń terezesinen qulap ketken. Qulaý bıiktigi shamamen 1,5 metr. Bala jabyq bas-súıek mı jaraqatyn alǵan, mıy shaıqalǵan, jelke súıeginiń oıyq synyǵy bar. 19 shildede bas súıegine trepanasıa jasaldy", – dedi dárigerler.
Qazir sábı aýrýhananyń travmatologıa bóliminde jatyr.
"Balanyń jaǵdaıy aýyr, birqalypty", – dedi dárigerler.
Bıyl jyl basynan beri Pavlodar oblysynda 11 bala terezeden qulap ketken, olardyń ekeýi qaza tapqan. Jaraqat alǵandardyń kópshiligi 5 jasqa deıingi balalar.
Polısıa men qutqarýshylardyń aıtýynsha, balalardyń terezeden qulaýy jaraqat alýdyń jáne ólim-jitimniń negizgi sebepteriniń biri bolyp otyr. Qaıǵyly oqıǵalardy boldyrmaý úshin mamandar bólmeni jeldetý kezinde balalardy qaraýsyz qaldyrmaýǵa, balkonǵa úlkenderdiń ertýinsiz shyǵarmaýǵa, tereze mańyna jıhaz qoımaýǵa jáne uıyqtap jatqan balany jalǵyz qaldyrmaýǵa keńes beredi. Terezelerge qaýipsizdik blokıratorlaryn nemese arnaıy torlar ornatý usynylady.