Bıyl órt qaýipsizdigi erejelerin buzǵan 10 511 kásipker eskertý alsa, 2 myńǵa jýyǵyna aıyppul salyndy. Tótenshe jaǵdaı mınıstrliginiń ókili jyl basynan beri órttiń azaıǵanyn aıtty, dep habarlaıdy almaty-akshamy.kz Informburo.kz silteme jasap.
TJM Órtke qarsy qyzmet komıteti tóraǵasynyń orynbasary Marat Hasenov órt qaýipsizdigi erejesin buzǵan kásipkerlerdiń kóbisine jeńildik jasalǵanyn málimdedi. Iaǵnı, olarǵa aıyppul salynýdyń ornyna ákimshilik jaza retinde tek eskertý jasalǵan.
"Jyl basynan beri memlekettik órtke qarsy qyzmetter 15 myń tekserý júrgizdi. Tekseris kezinde 68 myńnan astam ereje buzýshylyq anyqtaldy. Osy oraıda 12 myń kásipker ákimshilik jaýapkershilikke tartyldy. Biraq osynyń ishinde 10 511 kásipkerge ákimshilik jaýapkershilik eskertý túrinde bolǵanyn aıta ketý kerek. Al aıyppul 1 853 kásipkerge salyndy", – dedi Marat Hasenov.
Sondaı-aq ol jyl basynan beri órt sanynyń azaıǵanyn aıtty. Respýblıka boıynsha shamamen – 0,5%-ǵa azaıǵan.
Biraq, órt kezinde kóz jumǵandar sany ósken. Bıyl 43 adamǵa kóp. Órt jıi bolatyn sektorlar:
- turǵyn úı – 68;
- kólik quraldary – 20;
- sharýashylyq nysandary – 10-15.
Al órttiń negizgi shyǵý sebepteri:
- elektr qurylǵylaryn montajdaý jáne tehnıkalyq paıdalaný kezinde – 34;
- jylý quraldary – 16;
- órt tutatatyn quraldardy beıjaı paıdalaný – 28.