Astanada konsert bıletterine qatysty alaıaqtyq anyqtaldy
Astanada jalǵan konsert bıletterin satýmen aınalysqan alaıaqtyq sqema áshkerelendi, dep habarlaıdy Polisia.kz. Elorda turǵyndary tanymal «Orda» tobynyń konsertine jalǵan bıletter satyp alyp, aldanǵandaryn tek kire almaǵan sátte ǵana túsingen. Bul jaǵdaıdan keıin olar dereý polısıaǵa júgingen, dep habarlaıdy aqshamnews.kz
Sonymen qatar, basqa da azamattar reseılik tanymal ánshiniń konsertine kirý úshin jalǵan QR kodtar satyp alǵan. Bıletterdiń quny 10-nan 20 myń teńgege deıin bolǵan, al jalpy shyǵyn shamamen 200 myń teńgeni qurady.
Jedel-izdestirý is-sharalary barysynda Almaty aýdanynyń krımınaldyq polısıa bólimi bul alaıaqtyqqa 18 jastaǵy azamattyń qatysy bar ekenin anyqtady. Ol Instagram jelisinde jalǵan akkaýnt ashyp, tanymal oryndaýshylardyń konsertterine joq bıletterdi usynǵan. Polısıa kúdiktini jábirlenýshilerdiń aqsha aýdarǵan banktik shotyn tekserý arqyly tapty.
Tergeý barysynda jas jigit kinásin tolyq moıyndap, taǵy 11 alaıaqtyq áreket jasaǵanyn moıyndady.
Astana qalasynyń polısıa departamenti turǵyndarǵa áleýmettik jelilerdegi jarnamalyq siltemeler arqyly bıletter satyp almaýǵa keńes beredi. Kez kelgen sharaǵa bılet alý úshin tek resmı jáne tekserilgen saıttardy paıdalanýdyń mańyzdylyǵyn eskertedi.