Almaty qalasyndaǵy «Ońtústik» saıabaǵynyń soltústik bóliginde jańadan jasyl keńistik quryla bastady. Joba tabıǵı orta pen tarıhı sáýletti saqtaı otyryp iske aspaq. Óńirlik komýnıkasıalar qyzmeti uıymdastyrǵan baspasóz týry barysynda Almaty qalasynyń Qoǵamdyq keńistikterdi damytý basqarmasynyń basshysy Batyrhan Súleımenov osylaı dedi.
Almatydaǵy «Ońtústik» saıabaǵynyń janynda 4,1 gektar aýmaqta jańa jasyl aımaqtyń qurylysy bastaldy. Joba tabıǵı orta men bar aǵashtardy saqtaı otyryp, jaıly qoǵamdyq keńistik qurýǵa baǵyttalǵan.
«Bul aýmaq buryn qaraýsyz jatqan. Almaty qalasynyń ákimdigi osy jerdi qalpyna keltirýdi sheshken soń, biz bul aýmaqty satyp alyp, qurylys-montaj jumystaryna kirisip kettik», - deıdi basqarmanyń basshysy.
Abattandyrý aıasynda tarıhı qundylyǵy bar nysandardy saqtaý maqsatynda bar qurylymdardy jóndep, qalpyna keltirip, eskirgen shaǵyn sáýlettik formalardy jańa ári yqsham elementterge aýystyrmaq. Joba sheńberinde bıiktigi 4–4,5 metr bolatyn 120 úlken kóshet egiledi, onyń ishinde 40 kashtan, 40 jóke aǵashy men 40 kádimgi qaraǵaı bar.
Aýmaq 48 oryndyqpen, 48 qoqys jáshigimen, 167 jaryq baǵanymen jáne 30 kóshe beınebaqylaý kamerasymen jabdyqtalady. Sonymen qatar jaıaý júrginshi joldary salynyp, balalar men sport alańdary, jańa shaǵyn sáýlettik formalar ornatylady. Jobany júzege asyrý qalanyń jasyl qoryn saqtap qana qoımaı, turǵyndarǵa jaıly demalyp, serýendeıtin orta qalyptastyrýǵa múmkindik bermek.
«Saıabaq bárine qolaıly bolady. Buryn qaraýsyz qalǵan aýmaq balalar men qarttarǵa qaýiptirek bolatyn: Qalada saıabaq jetispeıtindikten, sondyqtan ony abattandyrýǵa májbúr boldyq», – dep atap ótti Batyrhan Súleımenov.