Almaty qoǵamdyq keńistikti damytyp jatyr. Shilde aıynda Dostyq dańǵylynyń Abaı dańǵylynan Ál-Farabı dańǵylyna deıingi bóligin qaıta jańǵyrtý jumysy bastaldy. Qoǵamdyq keńistikterdi damytý basqarmasy men Óńirlik komýnıkasıalar qyzmeti birlesip uıymdastyrǵan baspasóz týrynda BAQ ókilderi osy nysandy aralap kórdi.
Basqarma basshysy Batyrhan Súleımenovtyń aıtýynsha, joba qaladaǵy basty kúre joldyń boıynda jaıaý júrginshilerge arnalǵan jaıly aımaq qurýǵa baǵyttalǵan.
«Dostyq dańǵyly boıyndaǵy joldyń jıegi tar bolǵandyqtan, jaıaý júrginshiler velosıpedshilermen, samokat mingendermen qatar júre almaıdy. Sonddyqtan jaıaý júrginshiler men velosıpedke arnap joldy ekige jaratyn jobalyq sheshim qabyldandy», – dedi Batyrhan Súleımenov.
Qaıta jańartylǵan aýmaq – 1,5 shaqyrym, aýdany – 4,17 gektar. Jobada jalpy aýmaǵy 22 myń m²-den asatyn jol salynyp, jaıaý júrginshiler jamylǵysy ornatylady, onyń ishinde 15 197 m² asfált-beton joldar men trotýarlar, sondaı-aq 6 923 m² beton taqtadan turatyn jaıaý júrginshilerdiń aımaqtary da bar. Kógaldanǵan jerdiń kólemi 17 800 m²-den aspaq. Sonymen qatar sáýlettik árleý elementteri ornatylyp, turǵyndar úshin tartymdy núkteler jasalady.
«Dostyq dańǵyly boıynda biz tek jaıaý júrginshi aımaqtaryn abattandyrýdy kózdeıtin jumystardy istep jatyrmyz, jol bóligine tıispeımiz. Kólik qozǵalysy toqtamaıdy, erkin júre beredi. Bul adamdardyń júrip-turýyna qolaısyzdyq keltirmes úshin jasalyp otyr», – dep atap ótti basqarma basshysy Batyrhan Súleımenov.
Jumysty 2026 jyldyń naýryz aıynda aıaqtaý josparlanyp otyr.