Óńirlik komýnıkasıalar qyzmeti uıymdastyrǵan baspasóz týry barysynda Qalalyq qoǵamdyq keńistikterdi damytý basqarmasynyń basshysy Batyrhan Súleımenov qolǵa alynǵan osy sharýalar jaıly baıandady.
Onyń aıtýynsha, memleket basshysy men qala ákiminiń tapsyrmasy boıynsha A. Baıtursynuly men Q. Sátbaev kóshesiniń qıylysynda ornalasqan Geologtar aleıasy kúrdeli jóndeýden ótip, tolyq jańǵyrtylmaq. Aleıany jańartyp qana qoımaı, zaman talabyna saı etip, adamdarǵa qolaıly keńistik qurmaq oıda. Aýmaqtyń jalpy aýdany eki gektarǵa jýyqtaıdy.
«Qurylys-montaj jumysyna kirisip kettik. Eski qurylymdardy, sonyń ishinde avtoturaqty buzyp jatyrmyz qazir. Biraq A. Baıtursynuly kóshesi jaqtaǵy 10 kólik orny qalady. Munda óte qyzyqty oryn – stýdentter aımaǵy ashylady. Stýdentter men qala turǵyndary munda ýaqyt ótkizip, demalyp, shahmat, ústel tenısin oınaıdy», – dedi Batyrhan Súleımenov.
Q. Sátbaev eskertkishin aleıanyń ortalyq kireberis aımaǵyna kóshirip, aǵashtardy jaryqtandyratyn dekoratıvti jaryq júıesin ornatyp, plıtkaly jamylǵyny jańartpaq oıda. Jabaıy júzimmen kómkerilgen pergolalar men jańa oryndyqtar da qoıylady, sondaı-aq aleıanyń mazmunyn ashatyn mıneraldardan quralǵan art-nysan ornatý da josparda bar.
«Biz kógaldandyrýǵa erekshe kóńil bólemiz: munda úlken aǵashtar, butalar men gazon bolady, buryn sheshimin tappaǵan avtomatty sýarý júıesi engizemiz. Jasyl aımaqty gıdrosebý ádisimen abattandyramyz. Sonymen qatar «Kolızeı» – amfıteatr salynady, onda Q.Sátbaev atyndaǵy ýnıversıtet is-shara men úıirmeler uıymdastyra alady», – dep atap ótti ol.
Jobany sáýletshi Janna Spýner ázirlegen. Sonyń aıasynda «Muztaý 200» úlgisindegi jańa qoqys jáshikteri men Qazaqstandaǵy geologıa tarıhy týraly aqparat beretin 12 aqparattyq taqta ornatylmaq. Sondaı-aq demalysqa arnalǵan sańyraýqulaq tárizdi qalqa men ashyq aspan astyndaǵy kitaphana da ashylady.
«Bul kúndiz de, keshke de jaıly, tartymdy oryn bolady. Biz keńistikti kez kelgen ýaqytta qaýipsiz ári qyzyqty etý úshin dekoratıvti jaryqtandyrýdy belsendi túrde engizip jatyrmyz», – dep qosty Almaty qalasy Qoǵamdyq keńistikterdi damytý basqarmasynyń basshysy Batyrhan Súleımenov.
Shamamen úsh apta buryn bastalǵan joba jyl sońyna deıin aıaqtalyp qalady. Kúrdeli jóndeýden keıin Geologtar aleıasy mádenı, bilim berý men demalys qyzmetin biriktiretin osy zamanǵy ári jaıly qoǵamdyq keńistikke aınalady.