Áleýmettik mańyzy bar azyq-túlik taýarlaryna (budan ári – ÁMAT) qoıylatyn 15%-dyq saýda ústemesiniń saqtalýyn qamtamasyz etý jáne deldaldar tizbegin joıý maqsatynda, Almaty qalasynda azyq-túlik taýarlaryna baǵa belgileýdiń barlyq tizbegi boıynsha deldaldyq sqemalardy tekserý jónindegi Óńirlik komısıa jumys isteıdi, onyń quramyna jergilikti, ortalyq, quqyq qorǵaý organdary (Ekonomıkalyq tergeý, Saýda, Memlekettik kiris, Básekelestikti qorǵaý jáne damytý, Tehnıkalyq retteý departamentteri, Aýmaqtyq ınspeksıa jáne t.b.), sondaı-aq Almaty qalasy Kásipkerler palatasynyń ókilderi kiredi, dep habarlaıdy almaty-akshamy.kz.
Komısıa músheleri turaqty negizde qalanyń: «Túrksib», «Arystan», «Sary-Arqa», «Taý-Samaly», «Kók bazar», «Tastaq», Aq-Bulaq», «Barys-4» jáne taǵy sol sekildi negizgi azyq-túlik bazarlarynda baǵa belgileýdi baqylaý boıynsha is-sharalar ótkizip otyrady.
Atap aıtqanda, «Barys-4» bazaryn tekserý barysynda, Óńirlik komısıa 54 kásipkerdiń qyzmetinde zań buzýshylyqtyń jaıttaryn anyqtady, onyń 29-y taýardyń baǵalaryn kórsetpeı satqany úshin Qazaqstan Respýblıkasy Ákimshilik quqyq buzýshylyq týraly kodeksiniń 193-baby, qalǵan 25-i áleýmettik mańyzy bar azyq-túlik taýarlaryna qoıylatyn 15%-dyq saýda ústemesin qymbattatqany úshin Qazaqstan Respýblıkasy Ákimshilik quqyq buzýshylyq týraly kodeksiniń 204-4 baby boıynsha jaýapkershilikke tartyldy. «Barys-4» bazarynyń satýshylary arasyndaǵy deldaldar tizbegin joıý jáne áleýmettik mańyzy bar azyq-túlik taýarlaryna qoıylatyn 15%-dyq saýda ústemesiniń saqtalýyn qamtamasyz etý boıynsha jumys jalǵasatyn bolady jáne ol komısıanyń erekshe baqylaýynda qalyp otyr.
Aǵymdaǵy jyldyń basynan beri Óńirlik komısıa jumysynyń qorytyndysy boıynsha áleýmettik mańyzy bar azyq-túlik taýarlaryna qoıylatyn 15%-dyq saýda ústemesin qymbattatýdyń barlyǵy 213 jaıty anyqtaldy, 198 ákimshilik hattama jasaldy, sondaı-aq 25 tıimsiz deldal joıyldy.
Sondaı-aq, monıtorıń barysynda, quqyqtyq saýattylyqty arttyrý úshin, atalǵan bazar kásipkerleriniń áleýmettik mańyzy bar azyq-túlik taýarlarynyń baǵalaryn ustap turýǵa qatysty týyndaǵan máselelerine túsinik berildi, qosymsha retinde óz quqyqtaryn qorǵaý turǵysynan der kezinde den qoıý úshin múmkindik beretin sotqa deıingi rásimder týraly túsinik berildi, sondaı-aq «Sapaly ónim» áleýmettik jobasyn iske asyrý sheńberinde jáne Qazaqstan Respýblıkasynyń «Tutynýshylardyń quqyqtaryn qorǵaý týraly» zańnamasy normalarynyń sheńberinde, ishki naryqta azyq-túlik qaýipsizdigin qamtamasyz etý jáne tutynýshylardyń quqyqtaryn qorǵaý máseleleri talqylandy.