QR İshki ister mınıstrligi veıp, elektrondy temeki ónimderiniń aınalymy úshin jaýapkershilikti túsindirdi, dep habarlaıdy almaty-akshamy.kz.
QR İshki ister mınıstrligi Ákimshilik polısıa komıteti tóraǵasynyń orynbasary Renat Zýlhaırov 2024 jyldyń 20 maýsymynan bastap Qazaqstanda veıp, elektrondy temeki ónimderiniń, hosh ıistendirgishter men suıyqtyqtardyń aınalymy úshin qylmystyq jaýapkershilik týyndaıtynyn eske saldy.
«Ózderińiz biletindeı, buǵan deıin İİM qabyldanǵan ózgerister týraly halyqpen jáne kásipkerlermen keń aýqymdy quqyqtyq túsindirý jumystaryn júrgizdi. Atalǵan zattardy satý jáne taratý faktileri anyqtalǵan jaǵdaıda kinálilerge 200 AEK (738 400 teńgege deıin – AR) mólsherinde aıyppul, sol mólsherde túzeý jumystary ne 200 saǵatqa deıingi merzimge qoǵamdyq jumystar, ne 50 táýlikke deıingi merzimge qamaýǵa alý qaýpi bar. Temeki buıymdaryn, elektrondyq tutyný júıelerin, veıpterdi, hosh ıistendirgishter men suıyqtyqtardy ákelgeni jáne óndirgeni úshin múlki tárkilenip, eki jylǵa deıin bas bostandyǵynan aıyrý kózdelgen. Asa iri mólsherde ne birneshe ret jasalǵan osy áreketter úshin múlki tárkilenip, bes jylǵa deıin bas bostandyǵynan aıyrý jazasy kózdelgen. Qurmetti azamattar! Zańnamada kórsetilgen ózgerister Qazaqstannyń bolashaǵy jastardyń densaýlyǵyn saqtaýǵa baǵyttalǵan», – dep atap ótti Renat Zýlhaırov.