Premer-mınıstr Oljas Bektenovtiń tóraǵalyǵymen ótken keńeste Memleket basshysy Qasym-Jomart Toqaevtyń Úkimettiń keńeıtilgen otyrysynda bergen tapsyrmalaryn oryndaý máseleleri qaraldy. Atap aıtqanda, energetıkany damytý jáne ıadrolyq klaster qurý boıynsha naqty sharalar talqylandy. Bul týraly Aqshamnews.kz saıty habarlaıdy.
Keńes barysynda 2025–2031 jyldarǵa arnalǵan elektr energıasynyń boljamdy teńgerimi tyńdaldy. Bul qujat Prezıdenttiń elektr energetıkasy ınfraqurylymyn qarqyndy damytý jáne qajetti rezervter qurý jónindegi tapsyrmasyna sáıkes ázirlengen. Elektr energıasyn tutynýdyń turaqty ósýin eskere otyryp, jeke ınvestısıalar esebinen jumys istep turǵan elektr stansıalaryn jańǵyrtý arqyly 2035 jylǵa deıin 26,5 GVt kóleminde jańa generasıa qýatyn qurý josparlanýda.
Energetıka mınıstri Almasadam Sátqalıev Qazaqstanda birinshi atom elektr stansıasyn (AES) salý boıynsha áleýetti jetkizýshilermen júrgizilgen kelissózderdiń nátıjeleri týraly baıandady. Ol kelissózder barysynda el úshin eń tıimdi tehnologıalardy tańdaý máselesi basymdyqqa ıe bolǵanyn atap ótti.
Premer-mınıstr Oljas Bektenov AES salý kezinde ekonomıkalyq tıimdilikti barynsha qamtamasyz etýdiń mańyzdylyǵyn atap ótti. Jetkizýshini tańdaýda óndiristi jergilikti deńgeıde damytý, tehnologıa transferti men el ishindegi qundylyqty arttyrýǵa erekshe nazar aýdarý qajettigin tapsyrdy.
Sonymen qatar, atom ǵylymyn damytý, sala mamandaryn daıarlaý jáne bilim berý baǵdarlamalaryn jetildirý máseleleri de qaraldy. Bul baǵytta «Qazaqstan atom elektr stansıalary» JSHS basshysy Tımýr Jantıkın, Ulttyq ıadrolyq ortalyqtyń basshysy Erlan Batyrbekov jáne Iadrolyq fızıka ınstıtýtynyń basshysy Saıabek Sahıev ózderiniń saraptamalyq pikirlerimen bólisti.
Keńes qorytyndysynda Premer-mınıstr atom energetıkasyn damytý boıynsha naqty tapsyrmalar berip, saladaǵy jobalardy tıimdi iske asyrý úshin vedomstvolar arasyndaǵy úılesimdi jumystyń mańyzdylyǵyn erekshe atap ótti.