Jyl saıyn elde 13 myńnan astam adam onkologıalyq dertten kóz jumady.
Onkologıalyq aýrýlardan bolatyn ólim boıynsha birinshi orynda ókpe obyry (16,3%), ekinshi orynda – asqazan obyry (12%), úshinshi orynda – toq ishek obyry -10,6%). Bul týraly búgin Úkimet otyrysynda Densaýlyq saqtaý mınıstri Ajar Ǵınıat aıtty, dep habarlaıdy Almaty-akshamy.kz.
«Jekelegen óńirlerde emdeý júrgizý úshin jaǵdaılar ártúrli ekenin kórip otyrsyzdar. Máselen, Qyzylorda oblysynda onkologıa ortalyǵy tozǵan ǵımaratta ornalasqan, palatalar kóp oryndy. Pavlodar jáne Mańǵystaý onkologıa ortalyqtaryndaǵy zamanaýı kreslolary, fýnksıonaldyq tósekteri bar jeke palatardy mysal retinde alýǵa bolady», - dedi Ajar Ǵınıat.
Mınıstrdiń aıtýynsha, elimizdiń barlyq óńirlerinde sáýlelik terapıa júrgizý úshin jelilik údetkishter, al birqatar iri oblys ortalyqtarynda apparattar ornatylady. Sáýlelik emdeýdi keńeıtý jáne jetildirý kózdelgen (protondyq terapıa, ıntraoperasıalyq sáýlelik terapıa).
«Laparoskopıalyq hırýrgıany damytý, 3-D modeldeý jáne basyp shyǵarý arqyly rekonstrýktıvtik-plastıkalyq operasıalardyń spektrin keńeıtý úshin tıisti jabdyqtarmen jabdyqtaý kózdelgen. İsikke qarsy jańa dárilik zattarǵa qoljetimdilikti arttyrý maqsatynda targettik jáne ımýndyq-onkologıalyq preparattar jelisin keńeıtý (10 targettik, 2 ımýndyq-onkologıalyq preparatqa qoljetimdilik joq), gendik ınjenerıany, radıofarmasevtıkalyq preparattardy paıdalana otyryp terapıany engizý boıynsha jumys júrgiziletin bolady», - dedi mınıstr.
Mınıstr medısınalyq jabdyqtardy, dárilik preparattardy satyp alýǵa, mamandardy oqytýǵa, zamanaýı onkologıa ortalyqtaryn salýǵa, rekonstrýksıalaýǵa jáne kúrdeli jóndeý júrgizýge shamamen 474 mlrd teńge qajet ekenin aıtty.
2022 jylǵy 18 qazanda ótken Dúnıejúzilik densaýlyq saqtaý samıtiniń málimetteri boıynsha «Onkologıalyq aýrýlardyń basym bóliginiń aldyn alýǵa bolady. Obyr – úkim emes, toqtamaı kúresý qajet» delingen.