Bul týraly Densaýlyq saqtaý mınıstri Ajar Ǵınıat búgin ótken Úkimet otyrysynda málimdedi, dep habarlaıdy Almaty-akshamy.kz BAQ.KZ-ke silteme jasap.
Bes óńirde: Almaty qalasy, Atyraý, Almaty, Ulytaý, Jetisý oblystarynda jańa onkologıa ortalyqtaryn salý jáne Aqtóbe, Qostanaı oblystary men Shymkent qalasynda radıologıalyq korpýs pen operasıalyq-reanımasıalyq korpýstardy rekonstrýksıalaý josparlanyp otyr. Sondaı-aq sońǵy 3 jylda jańa onkologıa ortalyqtary paıdalanýǵa berilgen Mańǵystaý, Pavlodar jáne Jambyl oblystaryn qospaǵanda, barlyq óńirlerde onkologıa ortalyqtaryna kúrdeli jóndeý júrgizý kózdelgen, - dep atap ótti vedomstvo basshysy.
Sonymen qatar pallıatıvtik kómek jáne ońaltý baǵyty boıynsha qolǵa alynatyn sharalarǵa toqtaldy.
Onkologıalyq pasıentterge arnalǵan mobıldik brıgadalar jelisin, ınvazıvti emes jáne morfıni bar dárilik zattar spektrin, ońaltý kómegin keńeıtý jáne densaýlyq saqtaý mamandaryn pasıentterdi birtindep aýyrsyzdandyrý ádistemesine oqytý jónindegi is-sharalar qarastyrylǵan. Onkologıa boıynsha rezıdentýrada jyl saıyn keminde 50, sáýlelik terapıada keminde 10-12 oryndar sany ulǵaıtylatyn bolady. Medısınalyq emes mamandardyń (fızıkter, dozımetrıster, hımıkter) daıarlanatyn, biliktiligi arttyrylatyn, onyń ishinde álemniń jetekshi onkologıa ortalyqtarynda oqytylatyn bolady. Ulttyq ǵylymı onkologıa ortalyǵynyń bazasynda 2025 jylǵa qaraı klınıkaǵa deıingi zertteýler men isik genomy zerthanalary qurylady, - dedi Ajar Ǵınıat.