Qarapaıym aýyldan shyqqan qazaqstandyq AQSH-qa qonys aýdaryp, jańa ómir bastady. Jaqynda ol jelide ata-anasyn da janyna kóshirip alǵanyn bólisti. Batyl sheshimnen qoryqpaǵan azamat kim jáne onyń bul qadamyna ne túrtki boldy? Aqshamnews.kz tilshisi áreketimen kópti tańǵaldyrǵan Jasulanmen tildesti.
Óskemennen Nú-Iorkke jasalǵan qadam
Jasulan - Óskemen qalasynyń týmasy. Ol eldegi belgili bir kompanıada ekonomıs bolyp qyzmet istegen. Jasulan Nú-Iorkke nelikten kóship ketkeni týraly áńgimelep berdi.
"Qyzmet istegen kompanıamda meniń ornyma jańadan kelgen mamandy jumysqa alyndy. Men sol sátte bul kompanıada adal eńbek pen bilimniń emes, tanystyń róli mańyzdyraq ekenin uqtym. Bul men úshin jańa sheshim qabyldaý kerek degen belgi boldy. Jumys ornymnan aıyrylǵan soń birneshe nusqalardy qarastyryp, AQSH-qa kóshýdi jón kórdim. Ómirdi jańadan bastap, til úırenip, jergilikti ómirdi zerttedim. Munda bári basqasha ekenin túsinip, qalýdy sheshtim",- deıdi ol.
Jasulannyń jańa ómiri: aýyldaǵy ata-anasy AQSH-qa qalaı kóshti?
Nú-Iorkte jańadan bastalǵan tirshilik Jasulanǵa ońaıǵa soqpady. Sebebi ol qadamyn eń áýeli til úırenýden bastaǵan.
"Amerıkaǵa alǵash kelgende, árıne, ońaı bolǵan joq. Til, mádenıet, adamdardyń oılaýy - bári basqa. Biraq ýaqyt óte kele úırenip kettim. Qazir aǵylshyn tilin úırenip júrmin, jaı jumys tabý úshin emes, bolashaqta óz isimdi ashý úshin. Sonymen qatar, mundaǵy zańdar men júıeni de zerttep júrmin", - deıdi Jasulan.
Qazir ol barmen bolyp jumys isteıdi jáne qyrkúıekte aýyldaǵy ata-anasyn janyna kóshirip aldy.
"Jumysym adamdarmen tikeleı sóılesýge, energıa alýǵa múmkindik beredi. Jalaqym jaqsy, ózimdi de, ata-anamdy da qamtamasyz ete alamyn. Ata-anamnyń janymda bolýy - men úshin úlken qýanysh. Qazir olar da úırenip keledi, jańa ómirge beıimdelip jatyr. Elden alys júrgenimizben, mádenıet pen ultqa degen mahabbatymyz qashan da júregimizde. Anam jıi beshbarmaq ázirlep, Nú-Iorktegi qazaq dostarymyzben jıi aralasyp turamyz", - dep qosty ol.
"Amerıkada meni ustap turǵan nárse..."
Jasulan AQSH-taǵy ómir nesimen unaǵanyn jáne emıgrasıanyń onyń ómirlik kózqarasyna qalaı áser etkenin bólisti.
"Amerıkada meni ustap turǵan nárse - tańdaý erkindigi. Munda kim bolǵyń kelse, soǵan aınalýǵa múmkindik bar. Eń bastysy - eńbektený. Emıgrasıa meniń ómirge degen kózqarasymdy qatty ózgertti. Qazir bárin basqasha baǵalaısyń - erkindik, ýaqyt, adamdar", - deıdi qazaqstandyq.
Sonymen qatar, Jasulan eldegi jastarǵa eshteńeden qoryqpaý keregin, keleshekke, ózińe sený qajetin aıtty.
"Qazaqstandaǵy jastarǵa aıtatynym - qoryqpańdar. Armandaýdan, synaýdan qoryqpańdar. Álem keń, múmkindik kóp. Tek ózderińe senińder. Eshkim seniń ómirińdi sen úshin jaqsartpaıdy. Bári óz qolyńda", - dep qosty ol.
