Bes qazaqstandyq ýnıversıtet álemniń eń úzdik oqý oryndary qataryna endi, dep habarlaıdy Aqshamnews.kz.
Bul týraly Prezıdent Qasym-Jomart Toqaev «Qazaqstan – akademıalyq bilim aýmaǵy» halyqaralyq strategıalyq seriktester forýmynda málimdedi. Memleket basshysy elimizdegi joǵary oqý oryndarynyń bedeldi halyqaralyq reıtıńterdegi kórsetkishteri turaqty túrde jaqsaryp kele jatqanyn atap ótti.
Prezıdenttiń sózinshe, qazaqstandyq JOO-lardyń jetistigi álemdik bilim berý keńistigindegi elimizdiń ornyn aıqyndaı túsedi.
"QS halyqaralyq reıtıń agenttiginiń prezıdenti Nýnsıo Kvakvarellı myrza óz baıandamasynda bul máselege keńinen toqtaldy, Qazaqstan ýnıversıtetteriniń qarqyndy damyp kele jatqanyn erekshe atap ótti. Biz ortaq maqsat jolynda kúsh biriktirip, áriptestigimizdi nyǵaıta túsýge múddelimiz, birlesip jumys isteýge qashanda daıynbyz. Sondaı-aq elimizdiń 5 ýnıversıteti Times Higher Education basylymy usynǵan álemdegi úzdik oqý oryndarynyń tizimine qosyldy. Bul da biz úshin zor jetistik", – dedi Prezıdent.
Forýmda joǵary bilim sapasyn arttyrý, halyqaralyq seriktestikti kúsheıtý jáne úzdik bilim berý tájirıbelerin engizý máseleleri talqylandy.