Almaty qalasy ákiminiń jańadan taǵaıyndalǵan orynbasary Abzal Núkenov óziniń alǵashqy jumys saparyn qalanyń áleýmettik nysandaryn aralaýdan bastady. Sapar aıasynda ol qurylys barysymen jáne stýdenttik jataqhanalardyń jaı-kúıimen tanysty.
Abzal Núkenov aldymen Azamattyq avıasıa akademıasynyń jańa stýdentter úıine bardy. Jaqynda paıdalanýǵa berilgen bul zamanaýı ǵımarat 482 orynǵa arnalǵan. Ol Azamattyq avıasıa akademıasynyń jáne Almaty halyqaralyq áýejaıynyń janynda ornalasqan. Jataqhana jaılylyq, qaýipsizdik jáne energıa tıimdiligi boıynsha qazirgi zamanǵy talaptarǵa tolyq saı keledi.
Qala basshysynyń orynbasary jataqhananyń ishki bólmelerin aralap kórdi. Ol turǵyn bólmelerdi, kovorkıng aımaqtaryn, demalys jáne bos ýaqyt ótkizýge arnalǵan seksıalardy tekserdi. Stýdentter úıinde sport zaldary men demalys aımaqtarynan bólek, medısınalyq kabınet pen kórkeıtilgen aýla da bar. Bul ony stýdentterdiń baspanasy ǵana emes, jastardyń damý ortalyǵyna aınaldyrady.
Sapar barysynda Abzal Núkenov stýdenttermen tildesip, olardyń turmys jaǵdaıy men kóńil-kúıin surady, sondaı-aq ınfraqurylymdy jaqsartý jónindegi usynysyn tyńdady.
Ǵımarattyń eki qabatynda áli de tazalaý jumystary júrgizilip jatqandyqtan, ákimniń orynbasary josparlanǵan jumystardy ýaqytyly aıaqtaý jóninde tapsyrma berdi.
Buǵan deıin habarlanǵandaı, Kólik, Ǵylym jáne joǵary bilim mınıstrlikteri jáne Almaty qalasy ákimdiginiń qoldaýymen 2024 jyly jalpy aýmaǵy 7 myń sharshy metrden asatyn ákimshilik-qonaq úı keshenin «Qazaeronavıgasıa» RMK balansynan Azamattyq avıasıa akademıasynyń menshigine berý týraly sheshim qabyldanǵan. Bul sheshim ǵımaratty qaıta jańǵyrtýǵa jáne zamanaýı Stýdentter úıin ashýǵa múmkindik berdi. Joba stýdenttik jataqhanalar qurylysyn úılestiretin Jobalyq keńseniń jumysy aıasynda júzege asyryldy.
Abzal Núkenovtiń jumys sapary Qazaq ulttyq agrarlyq zertteý ýnıversıtetinde jalǵasty. Ákimniń orynbasary ýnıversıtettiń jańa oqý ǵımaratyn aralap kórdi. Bul ǵımaratta birneshe joǵary oqý ornynyń stýdentteri, sonyń ishinde sheteldik seriktes ýnıversıtetterdiń bilim alýshylary oqıdy.
Qazaq ulttyq agrarlyq zertteý ýnıversıteti basqarma tóraǵasynyń birinshi orynbasary – rektor, profesor Pirimqul Ibragımov oqý ornynyń damý jospary týraly baıandady.
– Ýnıversıtetti damytý baǵdarlamasy 2029 jylǵa deıingi kezeńdi qamtıdy. Baǵdarlama aıasynda ǵımarattardy kúrdeli jóndeý jáne jańa nysandar salý josparlanǵan. Jalpy búdjet shamamen 36,2 mlrd teńge, onyń 27 mlrd teńgesi – respýblıkalyq búdjet qarajaty, al qalǵan 9 mlrd teńge – ýnıversıtettiń ınvestısıasy. Buǵan qosa, stýdentter sanyn 10 myń adamǵa deıin arttyrý maqsatynda qosymsha oqý ǵımarattaryn salý jáne ınfraqurylymdy jańǵyrtý kózdelip otyr, – dedi oqý ornynyń rektory.
Sapar barysynda qala ákiminiń orynbasary Abzal Núkenov ýnıversıtettiń salynyp jatqan jataqhanasynda bolyp, qurylys jumystarynyń barysyn tekserdi. Ol ýnıversıtet basshylyǵymen kampýsty damytý, stýdentterdiń turmys jaǵdaıyn jaqsartý jáne oqý úderisiniń sapasyn arttyrý jaıyn talqylady.