Almaty haıýanattar baǵynda jýrnalıser men blogerlerdiń baspasóz-týry ótti. Óńirlik komýnıkasıalar qyzmeti uıymdastyrǵan is-sharada haıýanattar baǵynyń jańartylǵan kelbetin kórýge múmkindik aldyq.
Bıyl zoobaq ujymy janýarlardy kóbeıtý isinde aıtarlyqtaı jetistikke jetken. Veterınar dáriger Iýlıa Dýdkınanyń aıtýynsha, 31 túrli janýardan 87 tól alynǵan. Olardyń arasynda amýr jolbarysy, aq qasqyr, kengýrý, lemýr, buǵy men taýtekeler bar.
«Eń úlken qýanyshymyz – amýr jolbarysynyń jubynan eki kúshiktiń dúnıege kelýi. Bul nátıjege jetý úshin tórt jyl boıy júıeli túrde jumys istedik. Sonymen qatar, bıyl eki jup aq qasqyr tóldedi – birinen úsh, ekinshisinen bir bóltirik týdy. Bul elimizde sırek kezdesetin ári baǵaly túrleri», – deıdi Iý.Dýdkına.
Baq ákimshiligi aldaǵy ýaqytta koleksıany jańa ekzotıkalyq janýarlarmen tolyqtyrýdy josparlaǵan. Jaqyn arada AQSH-tan tamandýa men altyjolaqty kireýkeı, Kanadadan sileýsinder jetkizilmek. Al Almaty haıýanattar baǵy óz kezeginde sheteldik áriptesterine sátti kóbeıip jatqan aqquıryq búrkitterdi tabystaıdy.
Koleksıa jetekshisi Aıman Edgebaevanyń aıtýynsha, haıýanattar baǵynyń basty maqsaty – janýarlardy kórsetý ǵana emes, tabıǵatty qorǵaý jáne jastar arasynda ekologıalyq mádenıetti qalyptastyrý.
«Almaty haıýanattar baǵy jyrtqysh qustardy – saqaltaı, aq ıyqty jáne aq basty búrkitti, quzǵyn men grıfterdi kóbeıtý isinde halyqaralyq deńgeıde tanymal. Amerıkalyq Timbavati Wildlife Park uıymy bizdiń baqta kýmaıdyń tabıǵı jolmen kóbeıip jatqanyn erekshe atap ótti. Bul – búkil álemdegi sırek jaǵdaı jáne Almaty úshin úlken mártebe», – dedi A.Edgebaeva.
Búginde Almaty haıýanattar baǵy – eldegi tabıǵatty qorǵaý men bıoalýantúrlilikti saqtaý isindegi jetekshi ortalyqtardyń biri. İrgesi sonaý 1937 jyly qalanǵan park qazir Ortalyq Azıadaǵy eń tanymal rekreasıalyq jáne ekologıalyq ortalyqtardyń biri. Ol – almatylyqtar men qala qonaqtary úshin eń jıi baratyn demalys oryndarynyń biregeıi. Balalar men otbasylyq demalysqa arnalǵan negizgi baǵyttardyń biri retinde ishki týrızmge qosqan salymy da joǵary. Bıyldyń ózinde baqqa 1 mıllıonnan astam adam kelgen.