Futboldan Qazaqstan Premer-lıgasynyń osy mausymdaǵy jeńímpazy Almatyda anyqtaldy.
Ortalyq stadıonynda el bírínshílígíníń sheshushí 26-tury ayasynda almatylyq «Qaırat» elordalyq «Astana» komandasyn qabyldady. Alań qojaıyndary turnırlík kestede 58 ūpaımen bírínshí orynda tūrdy. Olarǵa chempıon atanu úshín jeńísten bólek, teń nátıje de jetkílíktí boldy. Al 56 ūpaımen ekínshí orynda tūrǵan elordalyq ūjymǵa míndettí túrde jeńíske jetu qajet edí. Táuelsíz Qazaqstan tarıhynda alǵash ret QPL jeńímpazy sońǵy turdaǵy ózara kezdesude sheshíldí.
Almaty men Astana komandalarynyń chempıondyq básekesínde Ortalyq stadıonda lyq toldy. «Qaırat» pen «Astana» matchyna bıletter satylymǵa shyqqan soń, sanauly saǵattarda satylyp, SOLD OUT jarıyalandy. Oıyn kúní jankúıerler Almatynyń basty sporttyq alańyna qalanyń túkpír-túkpírínen jınaldy. Qazaqstan Premer-lıgasynyń basty oıyny – tek elímízdíń emes, sheteldík jankúıerlerdíń de nazaryn ózíne audardy. Solardyń bírí – Manchester qalasynan kelgen tanymal bloger jáne StuntPegg atty YouTube-arnasynyń avtory Nıv Petrutstsıello.
– Qazaqstan turaly jaqynda ǵana estídím, bíraq bárín óz kózímmen kóru qyzyq boldy. «Qaırat» jaıly kóp oqydym. Ózím futbolmen tynystaıtyn qala – Manchesterdenmín. Bílemín, bírneshe jyl būryn «Manchester Yunaıted» «Astanamen» oınaǵan. Endí «Qaırat» pen «Astananyń» oıynyn kóruge keldím, ekeuí de óte myqty komandalar, sondyqtan oıyn áserlí bolatyny anyq, – dedí Nıv oıyn aldynda.
Al Ortalyq stadıonǵa alǵashqylardyń bírí bolyp kelgen 16 jastaǵy Tımur Meıramǵalıev oıyndy kóruge ata-anasy jáne ínílerímen bírge arnaıy at basyn būrǵanyn aıtty.
– Búgíngí oıyndy ótkízíp alu múmkín emes. Eldíń eń myqty ekí kluby kezdesedí, būl bízdíń maqtanyshymyz. Ásírese, ózím qatarly Sátpaevtyń oıynyn asyǵa kútíp júrmín. Búkíl otbasymyzben «Qaıratty» qoldaımyz. Men 8 jasymnan futbolmen aınalysamyn, endí ínílerím de bastady. Ákem būryn oınaǵan, futbol bízdíń otbasylyq dástúrímíz. Futbolǵa bír ret ǵashyq bolsań, ol ómíríníń bólshegíne aınalady, – dedí jankúıer.
Bírínshí taım
El klassıkosynda Italıyadan kelgen mamandar tóreshílík ettí. Oıynnyń bas tóreshesí – Matteo Markettı boldy. Qaptaldaǵy kómekshílerí – Valerıo Kolarossı men Krıstıan Rossı bolsa, VAR júıesín Davıde Gerzını baqylady. Matchtyń alǵashqy mınuttarynan bastap almatylyq komanda dopqa ıelík etíp, qarsylas qaqpasyna qauíp tóndírdí. Alaıda, «Astana» oıynshylary qorǵanysta ūıymshyldyq tanytyp, Iosıp Chondrıch tūrǵan qaqpaǵa asa qauíptí soqqy jasatpady. Kerísínshe, alań qonaqtary oıynnyń 15-mınutynda qarymta shabuylǵa shyǵyp, «Qaırat» qorǵanysynyń osal tūsyn tapty. Elordalyq shabuylshy Marın Tomasov dál soqqymen eseptí ashty. Ol bıyl el chempıonatynyń bírínshí turynda da almatylyqtarǵa gol soqqan edí. 22 jastaǵy «Qaırat» qaqpashysy Temírlan Anarbekov alys būryshqa ūshqan dopqa barynsha sekírgenímen, oǵan jete almady. Óz alańynda basty qarsylasyna ese jíberíp jatqan Rafael Urazbahtın shákírtterí bírínshí taımnyń ayaǵyna deıín «Astana» qaqpasynan sańylau ízdedí. 40-mınutta Ofrı Aradty «Qaırat» akademıyasynyń túlegí Damır Qasabulat almastyrdy. Alaıda, elordalyq komandanyń qorǵanysy syr bermedí. Qaıta 43-mınutta būryshtama dobynan keıín qaqpaǵa dál baǵyttalǵan dopty Anarbekov qaıtaryp, qarsylastyń eseptí eseleuíne múmkíndík bergen joq.
Úzílís jáne marapat
Almatyda ótíp jatqan tartysty oıyndy jankúıerlermen bírge alǵashqy mınuttardan bastap qazaqstandyq futboldyń ardagerlerí men qala ákímí Darhan Satybaldy tamashalady. Al oıyn úzílísí kezínde shahar basshysy 2025 jylǵy mausym qorytyndysy boıynsha «Qaırat» akademıyasynyń tárbıelenushílerín marapattady. Klub tarıhynda alǵash ret akademıyanyń barlyq jas komandasy óz lıgalarynda chempıon atandy.
Ekínshí taım
Oıynnyń ekínshí jartysynda alańǵa «Qaırat» tarapynan shabuylshy Edmılson qosyldy. Ol 20-shy nómerlí Erkín Tapalovty almastyrdy. Boıshań brazılıyalyq futbolshy alańǵa shyqqan keıín oıyn órnegí ózgerdí. Ol áuelete ūshqan dopty áríptesteríne jetkízíp, ótkír shabuyldarǵa jol ashty. Matchtyń 55-mınutynda Edmılson joǵarydan berílgen pasty Valerıı Gromykoǵa túsíríp berdí. Osy kezde aıyp alańynda «Astana» qorǵaushylary men «Qaırat» shabuylshylary arasynda tartys bastalyp, dop Dastan Sátpaevqa qaraı ytqydy. 17 jastaǵy oıynshy būl múmkíndíktí múlt jíbermeı, joıqyn soqqymen gol soqty. Sátpaevtyń osy mausymdaǵy 14-shí goly almatylyq ūjymdy turnırlík kestede qaıtadan alǵa shyǵardy.
Aıta ketken jón, bıyl bírínshí turdaǵy «Astanaǵa» qarsy oıynda Dastan chempıonattaǵy alǵashqy golyn soqqan edí. Esep teńesken soń, jígerlene túsken «Qaırat» oıynshylary taǵy bírneshe ret qauíptí Chondrıch qaqpasyna shabuyl jasady. Degenmen, keıde dáldík, keıde sáttílík jetíspedí. Oıyn sońynda chempıondyq uysynan shyǵyp bara jatqan elordalyqtar barynsha jeńís golyn soǵuǵa tyrysty. 90+4 mınutta būryshtama dobynan keıín Marın Tomasov qaqpaǵa 1 metrdeı jerden tíkeleı soqqy jasady. Alaıda, dop qaqpanyń mańdaıshasyna tıíp, alań syrtyna kettí. Tartysty oıyn 1:1 esebímen ayaqtaldy. Onyń nátıjesí boıynsha «Qaırat» 59 ūpaı, al «Astana» 57 ūpaı jınady. Osylaısha almatylyq komanda qatarynan ekínshí ret jáne óz tarıhynda besínshí ret Qazaqstan chempıony atandy. Būǵan deıín komanda 1992, 2004, 2020, 2024 jyldary el bírínshílígín jeńgen bolatyn. Match ayaqtalǵan soń, «Qaırat» oıynshylary Ortalyq stadıonda marapattalyp, alań ortasynda chempıondyq kubokty kóterdí. Al Kóktóbe mūnarasy almatylyq komandanyń tústeríne boyalyp, «mausym úshín rahmet» degen jazu paıda boldy. Ekínshí jyl qatarynan jeńíske jetken «Qaırat» taǵy da Chempıondar lıgasyna joldama aldy. Komanda osy mausymda endí syrt alańda «Inter», «Kopengagen», «Arsenalmen», al Almatyda «Olımpıakos» jáne «Bryuggemen» kezdesedí. Al 2026 jyldyń jazynda UEFA Chempıondar lıgasynyń íríkteu kezeńíne qatysady.
Ózge qazaqstandyq klubtardyń nátıjesín toqtalyp ótsek, Premer-lıgany ekínshí orynda ayaqtaǵan «Astana» UEFA Konferentsıyalar lıgasyna qatysyp, eurojarysqa íríkteudí ekínshí kezeńnen bastaıdy. Al chempıonatta úshínshí jáne tórtínshí oryn alǵan – «Tobyl» men «Elímaı» UEFA Konferentsıyalar lıgasyna íríkteudí bírínshí kezeńnen bastaıdy. 16 ūpaımen el bírínshílígín sońǵy orynda ayaqtaǵan «Tūran» kelesí mausymda futboldan Qazaqstan Bírínshí lıgasyna óner kórsetedí. Oıynshylar jeke nátıjelerí boıynsha «Astana» shabuylshysy Grıpshı 16 golmen chempıonattyń úzdík sūrmergení atandy. Odan keıín 14 gol soqqan «Qaırat» shabuylshysy Dastan Sátpaev tūr. Úzdík úshtíktí 12 golmen Marın Tomasov túıíndedí.
Rafael URAZBAHTIN, «Qaırat» futbol klubynyń bas bapkerí:
– Úzílís kezínde áńgíme joǵary dauyspen óttí. Bírínshí taımdaǵy oıynymyz ūnamady. Qaqpaǵa soqqy az, al qarsylas qauíptí sátterdí kóbírek jasady. Qarsylasty da moıyndau kerek. Olar bízge oıyn tízgínín beríp, kútpegen taktıka qoldandy. Bíz, kerísínshe, olar dopqa kóbírek ıelík etedí dep oılaǵanbyz. Bíraq olar bízdí óz alańdaryna tartyp aldy. Sol qarymta shabuyldardyń bírí arqyly gol soqty. Úzílíste oıynshylarǵa: «Būlaı bolmaıdy. Jankúıerlerdíń aldynda būlaı oınauǵa haqymyz joq. Búkíl stadıon bízdí qoldauǵa keldí, bíz jeńílmeuímíz kerek» degen sózder aıtyldy!
Bastysy, chempıon bolǵanymyzǵa óte quanyshtymyz. Barlyq jankúıerlerdí osy jeńíspen qūttyqtaımyn! Būl bíz úshín tarıhı kún – «Qaırat» alǵash ret qatarynan ekí ret chempıon atandy. Bíz osy jetístíkke maqsatty túrde ūmtyldyq. Oıynshylarǵa úlken alǵys aıtamyn, būl olardyń eńbegíníń jemísí. Qajyrly eńbek óz nátıjesín beredí. Bíz óte quanyshtymyz!
