Prezıdent Qasym-Jomart Toqaevtyń áleýmettik mańyzy bar azyq-túlik baǵasyn turaqtandyrý jáne otandyq óndirýshilerdi qoldaý jónindegi tapsyrmasyn oryndaý aıasynda Almaty qalasynyń ákimi Darhan Satybaldy azyq-túlik ónerkásibi kásiporyndaryn aralady.
Sapar barysynda qala basshysy «Aqsaı» nan-toqash kombınaty, «Almaty nan» nan kombınaty jáne «Maslo-Del» kompanıasynda boldy.
«Aqsaı» nan-toqash kombınatynda ákim óndiristik jeliler men jetkizý logıstıkasymen tanysty. Kásiporyn jyl saıyn shamamen 48,7 myń tonna ónim shyǵaryp, qala halqynyń áleýmettik nanǵa degen suranysynyń 50%-yna deıin qamtamasyz etedi. Munda 1 200-den astam qyzmetker jumys isteıdi.
«Almaty nan» kombınaty táýligine 100 tonnaǵa deıin nan-toqash ónimderin shyǵarady, onyń 30 tonnasy áleýmettik nanǵa tıesili. Kompanıada 166 adam eńbek etedi, ortasha jalaqy – 300 myń teńge. Eki kásiporyn birigip, almatylyqtardyń nan-toqash ónimderine, sonyń ishinde áleýmettik nanǵa degen negizgi suranysyn qamtamasyz etip otyr.
Sapar «Maslo-Del» kompanıasyna barýmen aıaqtaldy. Bul Qazaqstandaǵy maı-toń maı jáne sút ónimderin shyǵaratyn iri kásiporyndardyń biri. Kásiporyn bes óndiristik alań men 24 satý fılıalyn biriktiredi, onda 3 000-nan astam adam jumys isteıdi. Óndiristiń jyldyq kólemi 150 myń tonnadan asady, bul keıbir ónim sanattary boıynsha eldiń ishki naryǵynyń shamamen 33%-y.
Qala ákimi Almatynyń otandyq óndirýshilerdi júıeli túrde qoldaıtynyn, óndiristi jańǵyrtý men keńeıtýge jaǵdaı jasaıtynyn atap ótti.
«Ákimdik tarapynan óndirýshilerge qajetti qoldaý kórsetýge daıynbyz. Eń bastysy, áleýmettik mańyzy bar azyq-túlik baǵasynyń ósýine jol bermeý, olardyń turaqty óndirisi men ishki naryqqa úzdiksiz jetkizilýin qamtamasyz etý», — dedi Almaty ákimi Darhan Satybaldy.
Sapar qorytyndysy boıynsha qala basshysy tıisti basqarmalarǵa kóterme jáne bólshek baǵaǵa turaqty monıtorıń júrgizýdi, kásiporyndarǵa ınfraqurylymdyq jáne kadrlyq máselelerdi sheshýde járdemdesýdi, sondaı-aq baǵa qalyptastyrýdyń ashyqtyǵyn saqtap, azyq-túlik jetkizilimderiniń turaqtylyǵyn qamtamasyz etýdi júktedi.
Almaty ákimdigi aldaǵy ýaqytta da otandyq kásiporyndarǵa jan-jaqty qoldaý kórsetip, áleýmettik mańyzy bar azyq-túlik baǵasyn baqylaýdy jáne megapolıstiń azyq-túlik qaýipsizdigin basty nazarda ustaıdy.