Almaty oblysy, Saımasaı aýylynda 27 qazanda bolǵan qaıǵyly oqıǵa eldi dúr silkindirdi. Aldyn ala málimetke sensek, 6-synyp oqýshysy óz úıiniń aýlasynda ózine qol jumsaǵan. Jergilikti bilim basqarmasy qaza tapqan balanyń otbasy esepte turǵanyn alǵa tartsa, aýyl turǵyndary turmystyq zorlyq-zombylyq derekteri anyqtalmaǵanyn habarlap, qaıǵyly oqıǵaǵa basqa jaǵdaı sebep bolǵanyn aıtyp otyr, - dep habarlaıdy Aqshamnews.kz tilshisi.
Bilim basqarmasynyń málimdemesi
Almaty oblystyq bilim basqarmasynyń dereginshe, bala úıdiń ortanshysy. Ol anasymen, ógeı ákesi jáne baýyrlarymen birge turǵan.
2024 jyldan beri otbasy turmystyq jaǵdaıynyń sanıtarlyq talaptarǵa saı bolmaýyna baılanysty profılaktıkalyq esepte turǵan. Uıymdastyrylǵan tekseris nátıjesinde úı jaǵdaıy jaqsarǵany aıtylǵan. Onyń ústine, mektep pen aýdandyq qyzmetter tarapynan otbasyǵa qoldaý kórsetilip otyrǵany aıtyldy.
"Balanyń minez-qulqy men oqý úlgerimi qanaǵattanarlyq boldy. Qajetti áleýmettik kómek kórsetilip otyrdy" , - dep habarlady basqarma.
Qazir psıhologtar otbasyǵa kómek kórsetip jatyr, al quqyq qorǵaý organdary tergeý júrgizip jatyr.
Aýyl turǵyndary ne deıdi?
Al aýyl turǵyndary jaǵdaı múlde basqasha bolǵanyn aıtady. Olardyń sózinshe, otbasy kópten beri qıyn jaǵdaıda ómir súrgen:
-
anasy men ógeı ákesi ishimdik ishken,
-
úıde jıi janjal bolǵan,
-
balalar ash, kir-qojalaq júrgen,
-
ógeı ákesi balalardy únemi uryp-soqqan.
Kórshileri balalardy birneshe ret tamaqtandyrǵandaryn, kıim bergenderin aıtady. Turǵyndardyń aıtýynsha, qaza tapqan balany eń kishi inisi aýlada taýyp alǵan, al ata-anasy sol sátte úıde bolmaǵan.
"Ógeı ákesi balalardy qatty uratyn. Bir ret kórshilerdiń shkafyna tyǵylyp, jylap otyrǵanyn kórdik," – deıdi aýyl turǵyny.
Sondaı-aq jergilikti jurt balanyń mektepten de qysym kórgenin alǵa tartady.
"Men eshkimge kerek emespin...": oqýshynyń sońǵy hatynda ne jazylǵan?
Oqıǵadan keıin jelide balaǵa tıesili delingen kúndeliktiń sýretteri tarady. Onda jasóspirimniń aýyr psıhologıalyq kúıde bolǵany baıqalady:
"Men eshkimge kerek emespin... Nege maǵan únemi ursyp, ura beredi? Men bótenmin, kereksizbin. Men ózimdi tómen sezinetin mektepke keldim. Aınalamnyń bári qýanyp, baqytty júredi. Men nege baqytty bola almaımyn?", - dep jazylǵan 6-synyp oqýshysynyń óler aldyndaǵy hatynda.
Sonymen birge "NeMolchı.kz" qory da balanyń mektepte jáne úıde jábir kórgeni týraly shaǵymdanǵanyn habarlady.
Polısıa jaýaby
Almaty oblystyq polısıa departamenti qylmystyq is qozǵalǵanyn rastady. Tergeý erekshe baqylaýǵa alynǵan.
"Barlyq mán-jaı tolyq zertteledi. Qylmystyq is aıasynda obektıvti sheshim qabyldanady," – dedi vedomstvo.