Mańǵystaý oblysynda Jańaózendegi mektep oqýshylary arasyndaǵy janjalǵa qatysty sot sheshimi shyqty, - dep habarlaıdy Aqshamnews.kz tilshisi.
Oqıǵa áleýmettik jelide taraǵan beınejazbadan keıin úlken qoǵamdyq rezonans týdyrdy. Vıdeoda eki jasóspirim qyzdyń bir-birin aıaýsyz soqqyǵa jyǵyp, tóbelesti qatarlastary men kishkentaı balanyń kóz aldynda jalǵastyrǵany kórinedi.
Oqıǵa qalaı boldy?
Sottyń málimetinshe, 2025 jyldyń 8 qazanynda saǵat 21:00 shamasynda Jańaózen qalasynyń kósheleriniń birinde eki jasóspirim qyz arasynda janjal týyndap, tóbeleske ulasqan. Qyzdardyń biri túrli jaraqat alǵan. Oqıǵa kýágerleri túsirgen vıdeo Instagram jelisinde jyldam tarap, qoǵam men quqyq qorǵaý organdarynyń nazaryn aýdardy.
Anasyna aıyppul salyndy
Sot otyrysy barysynda qyzdardyń biri tárbıesine jaýapty anasynyń bala tárbıeleý mindetterin tıisti deńgeıde oryndamaǵany anyqtaldy. Bul QR ÁQBtK-niń 127-baby 3-bóligi boıynsha ákimshilik quqyqbuzýshylyq bolyp tanyldy.
Jaýapker áıel óz kinásin moıyndaǵanymen, janjaldy qarsy taraptyń birinshi bolyp bastaǵanyn aıtty. Soǵan qaramastan, sot ony kináli dep tanyp, 78 640 teńge (20 AEK) kóleminde aıyppul saldy.
Sheshim zańdy kúshine engen joq
Sot úkimi áli zańdy kúshine enbegen. Atalǵan bap boıynsha aıyppuldan bólek, 10 táýlikke deıin ákimshilik qamaýǵa alý sharasy da qarastyrylǵan.
Sot ókilderi ata-analar balalardyń tárbıesi men minez-qulqyna jaýapty ekenin eske saldy. Mundaı jaǵdaılardyń jasóspirimderdiń psıhologıalyq jaǵdaıyna jáne qoǵamdyq tártipke teris áser etetini atap ótildi.