Nıderland Koróldiginiń astanasynda 30 qazan kúni Almaty qalasy mýzeıler birlestiginiń «Dástúr sabaqtastyǵy: ata-baba murasy» atty kórmesi ashyldy. İs-sharaǵa dıplomatıalyq korpýs ókilderi, halyqaralyq jáne qoǵamdyq uıymdardyń basshylary, mádenıet jáne óner qaıratkerleri, sondaı-aq buqaralyq aqparat quraldarynyń ókilderi qatysty.
Kórme Almaty qalasy ákimdiginiń, Qazaqstan Respýblıkasynyń Nıderland Koróldigindegi Elshiliginiń, Túrkıa Respýblıkasynyń Nıderland Koróldigindegi Elshiliginiń jáne Iýnýs Emre ınstıtýtynyń qoldaýymen uıymdastyryldy. Bul qazaq halqynyń baı mádenı murasyn pash etetin mańyzdy mádenı oqıǵa.
Bes taqyryptyq bólimnen turatyn ekspozısıa Almaty qalasy mýzeıler birlestiginiń qorynan alynǵan 70-ten astam biregeı jádigerdi usynady. Olardyń qatarynda qazaq halqynyń turmys-tirshiligi men dástúrlerinen syr shertetin etnografıalyq artefaktiler, sándik-qoldanbaly óner týyndylary, sondaı-aq qazaq jáne túrki halyqtarynyń mýzykalyq aspaptary bar.
Aıta keteıik, Qazaqstan Respýblıkasy men Nıderland Koróldigi arasyndaǵy dıplomatıalyq qatynas 1992 jyly 10 qyrkúıekte ornaǵan.
Iýnýs Emre ınstıtýtyndaǵy bul kórme 2025 jyly 14 qarashaǵa deıin jalǵasady.