Almatyda Dúnıejúzilik ınsýltke qarsy kúres kúnine oraı, qalalyq Qoǵamdyq densaýlyq saqtaý basqarmasynyń qoldaýymen, «Insýltke qarsy kúrestiń jahandyq strategıalary» atty halyqaralyq ǵylymı-praktıkalyq konferensıa ótip jatyr.
Uıymdastyrýshylary – ASIAN SOCIETY HEART/BRAIN qoǵamdyq birlestigi, Insýlt problemalary jónindegi respýblıkalyq úılestirý ortalyǵy jáne Almaty qalalyq Jedel shuǵyl kómek kórsetý aýrýhanasy.
Konferensıa Qazaqstan, AQSH, Italıa, Reseı jáne Ýkraına elderiniń jetekshi sarapshylarynyń basyn biriktirdi. Qonaqtar arasynda profesor Paola Marangolo (Italıa), Evgenıı Sıdorov (AQSH), Alekseı Gýsalúk, Dmıtrıı Býrenchev, Kırıll Salımov, Lev Prıstýpúk jáne ózge de mamandar bar.
Bas taqyryptar qatarynda – ınsýltti emdeýdiń zamanaýı tásilderi, jasandy ıntellekt róli, ońaltý men tamyr júıesi aýrýlarynyń aldyn alý máseleleri.
«Bul konferensıa – tek kezekti shara emes, ómirdi saqtap qalýǵa baǵyttalǵan mańyzdy kásibı alań. Búginde bizdiń aýrýhana bazasynda úshinshi deńgeıli ınsýlt ortalyǵy jumys isteıdi. Munda táýlik boıy joǵary tehnologıalyq ıntervensıalyq emsharalar oryndalyp, jedel kómek kórsetiledi. Biz kún saıyn ýaqytyly qabyldanǵan sheshim men zamanaýı tásildiń naýqas taǵdyryn qalaı ózgerte alatynyna, ıaǵnı onyń sóıleý qabiletin, qımyl-qozǵalysyn jáne ómir sapasyn qalpyna keltirýge múmkindik beretinine kýá bolyp kelemiz. Insýlt – densaýlyq saqtaý júıesindegi eń ózekti máseleniń biri. Elimizde jyl saıyn 42 myńnan astam jańa jaǵdaı tirkeledi, ókinishke qaraı, múgedektik deńgeıi de artyp keledi. Sondyqtan bilimdi jetildirý, tájirıbe almasý jáne jańa tehnologıany engizý – tek medısına mamandarynyń emes, barshamyzdyń, ıaǵnı qoǵam men árbir dárigerdiń ortaq jaýapkershiligi», – dedi Almaty qalalyq Jedel shuǵyl kómek kórsetý aýrýhanasy dırektorynyń orynbasary Baǵdat Álimbetov.
Al atalǵan aýrýhanadaǵy Insýlt ortalyǵynyń meńgerýshisi, joǵary sanatty nevrolog Lázzat Aıaǵanova júkti áıelder arasynda kezdesetin sırek ári kúrdeli ınsýlt jaǵdaılary týraly baıandap, kópbeıindi tásil men ýaqtyly dıagnostıkanyń mańyzyn atap ótti.
«Júkti áıelder arasynda ınsýlt shamamen 100 myń bosanýǵa shaqqanda 30 jaǵdaı jıiliginde kezdesedi. Ólim kórsetkishi 10%-ǵa deıin, al múgedektikke ákelý qaýpi 50%-ǵa deıin jetedi. Trombofılıasy bar áıelderde ınsýlt damý qaýpi 4-6 ese joǵary. Júkti áıelderde ınsýlttiń 60%-ǵa deıini krıptogendi, ıaǵnı sebebi anyqtalmaǵan bolyp qalady. Táýekel faktorlaryna EKO, preeklampsıa, trombofılıa, antıtrombın III tapshylyǵy jáne jasy 35 jastan asqan áıelder jatady», – dedi Lázzat Aıaǵanova.
Konferensıanyń plenarlyq jáne seksıalyq otyrystarynda ınsýltten keıingi ońaltý, telemedısınany damytý jáne halyqtyń ınsýlttiń aldyn alý jónindegi saýattyǵyn arttyrý máseleleri qozǵaldy.
Basqosý – túrli el mamandarynyń tájirıbe almasýyna jáne ınsýltten bolatyn ólim-jitim men múgedektikti azaıtýǵa baǵyttalǵan ortaq sheshimderdi talqylaýǵa tıimdi alań.
«Insýlt búginde álem boıynsha ólim men múgedektikke ákeletin negizgi sebeptiń biri bolyp otyr. Keıingi jyldary neırohırýrgıa salasynda úlken serpilis baıqalýda – joǵary dáldiktegi navıgasıa, endovaskýlárlyq aralasý, gıbrıdti ota jasaý bólmesi men robottandyrylǵan júıeler keńinen engizilip keledi. Insýltti hırýrgıalyq emdeýdiń zamanaýı tásilderi, sonyń ishinde mınımaldy ınvazıalyq ádisterdiń trendteri, tromboekstraksıa múmkindikteri, ıntraotalyq monıtorıń pen neıronavıgasıany paıdalaný, sondaı-aq jasandy ıntellekt pen robottalǵan hırýrgıanyń keleshegi týraly jan-jaqty aıtylǵan konferensıanyń bereri mol», – dedi Almaty qalalyq Jedel shuǵyl kómek kórsetý aýrýhanasynyń neırohırýrg mamany Darhan Jetpisbaev
Konferensıanyń ekinshi kúni erteń qalalyq Jedel shuǵyl kómek kórsetý aýrýhanasynda jalǵasady. Munda qatysýshylarǵa praktıkalyq kórsetilim men sheberlik sabaqtary usynylady.